AQSh armıa hatshysy Den Drıskoll qyzmetinen ketti. Bul týraly CBS telearnasy habarlady. Ol bul qyzmette shamamen 18 aı bolǵan. Onyń ketýine Qorǵanys mınıstri Pıt Hegsetpen aılar boıy jalǵasqan qaqtyǵystar sebep bolǵan. Drıskolldy prezıdent Donald Tramptyń «dron adamy» dep ataıtyn. Ol tarıhtaǵy eń jas armıa hatshysy edi. Aq úı CBS-ke Drıskolldyń «Amerıkany qaıtadan kúshti etý» baǵdarlamasyn ilgeriletýde «óte tıimdi» bolǵanyn jáne áskerı operasıalar kezinde «úzdik kóshbasshylyq» tanytqanyn aıtty. BBC bul máselege qatysty Aq úıge, Pentagonǵa jáne armıaǵa suraý joldady.
Drıskoll — sońǵy kezderi qyzmetinen ketken joǵary laýazymdy áskerı tulǵalardyń biri. Oǵan deıin Áskerı-teńiz kúshteriniń hatshysy Djon Felan sáýirde kenetten otstavkaǵa ketken edi. Sondaı-aq, armıa shtabynyń bastyǵy Rendı Djordj, armıa generaly Devıd Hodn jáne general-maıor Ýılám Grın de qyzmetterinen ketken. Pentagonǵa kelgennen beri Hegset onnan astam joǵary áskerı ofıserlerdi, onyń ishinde Áskerı-teńiz kúshteriniń bas qolbasshysy men Áýe kúshteri bas shtaby bastyǵynyń orynbasaryn qyzmetinen bosatqan.
Drıskoll men Hegset arasyndaǵy alaýyzdyqtyń mán-jaıy belgisiz. Degenmen, CBS-tiń aıtýynsha, armıa hatshysy Djordjben jaqyn dos bolǵan. Al Djordjdy Hegset otstavkaǵa ketýdi suraǵan delinedi. Armıa hatshysy — AQSh armıasynyń azamattyq basshysy, ol belsendi áskerı qyzmetkerlerdi, sondaı-aq Ulttyq gvardıa men rezervtegi sarbazdardy basqarady. Drıskoll buǵan deıin armıada qyzmet etken, 2007 jyly ofıser ataǵyn alǵan, kavalerıa vzvodyn basqarǵan jáne 2009 jyly Irakqa birneshe aıǵa jiberilgen.
Armıa hatshysy retinde Drıskoll jańa urys tehnologıalaryn qoldaýymen tanymal boldy, sondyqtan ony Tramptyń «dron adamy» dep atady. Ótken jyly ol Reseı-Ýkraına soǵysyn toqtatýǵa baǵyttalǵan kelissózderde mańyzdy ról atqardy, sheteldik saparlarǵa shyǵyp, Ýkraına prezıdenti Vladımır Zelenskımen kezdesti. Ol sondaı-aq vıse-prezıdent Djeı Dı Venstiń jaqyn dosy ári seriktesi, onymen Iel zań mektebinde tanysqan. AQSh armıasyn basqarǵan kezinde ol Tramptyń Ulttyq gvardıany amerıkandyq qalalarǵa jiberý sheshiminde mańyzdy tulǵa boldy. Sonymen qatar, ol Аlkogól, temeki, atys qarýy jáne jarylǵysh zattar búrosynyń ýaqytsha dırektory qyzmetin de atqardy.