AQSh ákimshiligi 200 myńǵa jýyq bosqyn vızasyn joıýdy josparlap otyr. Bul týraly Associated Press agenttigi memlekettik departament qujattary men eki amerıkalyq sheneýnikke silteme jasap habarlady.
Donald Tramp ákimshiligi dúısenbi kúni AQSH-qa qysqa merzimdi kelýshi retinde kirip, keıin turaqty turý úshin bosqyn mártebesin suraǵan sheteldikterdiń ımıgranttyq emes vızalaryn joıýdy josparlaıtynyn málimdedi. Bul — ımıgrasıany qatańdatý boıynsha keń aýqymdy sharalardyń sońǵysy.
Memlekettik departament ókiliniń aıtýynsha, olar İshki qaýipsizdik departamentimen birlesip, «AQSH-qa qysqa merzimdi kelýshi retinde kelgen, biraq turaqty turý úshin bosqyn mártebesin suraǵan sheteldikterdiń ımıgranttyq emes vızalaryn anyqtap, joıýdy» úılestirýde.
Memlekettik departament bul proseste qansha vızanyń joıylatynyn naqty aıtpady. Alaıda Associated Press málimetinshe, bıznes jáne týrızm vızalarynyń 200 myńǵa deıin joıylýy múmkin. Bul júzege assa, AQSh tarıhyndaǵy eń iri jappaı vıza joıý sharasy bolmaq.
Associated Press habarlaýynsha, memlekettik departament 2016-2026 jyldar aralyǵynda berilgen B1 jáne B2 vızalaryn joıady. Bul vızalar bıznes jáne týrızm maqsatynda beriledi. Olardyń ıeleri bosqyn mártebesin suraǵan nemese qazir surap jatqandar.
Vızalardyń joıylýy dereý deportasıaǵa ákelmeıdi. Kópshiliginiń bosqyn isi qaralyp jatqandar qaıta sanattalady, biraq bıznes nemese týrızm sanatynan aıyrylady.
Dúısenbi kúni AQSh memlekettik hatshysynyń orynbasary Krıstofer Landaý X áleýmettik jelisinde amerıkalyq ımıgrasıa júıesi «uzaq ýaqyt boıy negizsiz bosqyn ótinimderimen tolyp ketkenin» jazdy.
Memlekettik departament osy aıdyń basynda Tramp ákimshiligi kezinde 175 myńnan astam sheteldik azamattyń vızasy joıylǵanyn habarlaǵan.
AQSh prezıdenti ımıgrasıany qatańdatý sharalaryn júrgizip jatyr. Oǵan vızalar men grın-kartalardy joıý jáne agressıvti deportasıa naýqany kiredi. Onyń aıtýynsha, bul sharalar ishki qaýipsizdikti jaqsartýǵa baǵyttalǵan.
Quqyq qorǵaýshylar bul sharalar sóz bostandyǵy men zańdy proses quqyqtaryn buzyp, ásirese etnıkalyq azshylyqtar úshin qaýipti orta týǵyzatynyn aıtady. Olar násildik profıldeý máselesin kóterip otyr.
Tramp 2024 jyly zańsyz ımıgrasıany toqtatý ýádesimen saılaýǵa túsken. Alaıda onyń ákimshiligi zańdy ımıgrasıany da qıyndatyp jatyr. Mysaly, keıbir jumys vızalaryna ótinish berýshiler úshin jańa jáne qymbat alymdar engizildi. Úkimettiń bul sharalary sotta daýlanýda.