AQSH-tyń Iýta shtatynyń sýdıasy Taıler Robınsondy konservatıvti belsendi Charlı Kırkti óltirdi dep aıyptap, ony aýyrlatpalyq mán-jaılar boıynsha sotqa tartýǵa bolatynyn sheshti. Bul is ólim jazasyn qoldaný múmkindigin kózdeıdi, dep habarlaıdy infohub.kz saıty.
Sýdıa Tonı Graftyń bul sheshimi seısenbide ótken taraptardyń qorytyndy aýyzsha pikirtalasynan keıin qabyldandy. Proses barysynda advokattar negizinen Robınson kináli dep tanylǵan jaǵdaıda ólim jazasyna kesilýine negiz bolatyn aýyrlatpalyq mán-jaıdy talqylady.
«Bul dáleldemelerdi aıyptaý úshin eń qolaıly turǵydan qarastyra otyryp, qazirgi kezeńde olar aıyptalýshynyń Charlı Kırkti atyp óltirgen adam ekenin negizdi túrde boljaýǵa jetkilikti», — dedi sýdıa Graf.
Sondaı-aq sýdıa atys kezinde basqa adamdarǵa da naqty jáne belgili ólim qaýpi bolǵanyn anyqtady. Bul prokýratýraǵa ólim jazasyn kózdeıtin aýyrlatpalyq mán-jaı boıynsha aıyp taǵýdy talap etýge múmkindik berdi.
Kırk otbasy atynan jasalǵan málimdemede sýdıanyń sheshimi olardyń ádildikke umtylýyndaǵy mańyzdy qadam bolǵany aıtylady. «Bul prosestegi árbir qadam Charlıdiń ólimi onyń otbasynan, ásirese ákesiz ósetin balalarynan ne alyp ketkenin eske salady. Biz bir jyl boıy biz úshin duǵa etip, qoldaý kórsetip, qasymyzda bolǵan barlyq adamdarǵa alǵys bildiremiz», — delingen málimdemede.
Eske salaıyq, amerıkalyq tanymal konservatıvti bloger, Donald Tramptyń jaqtaýshysy Charlı Kırk 2025 jyldyń 11 qyrkúıeginde Iýta shtatynda sóz sóılep turǵan kezde atyp óltirilgen edi. FBR kúdiktiniń ustalǵanyn habarlady. 12 qyrkúıekte kisi óltirý kúdigimen 22 jastaǵy Taıler Robınson ustaldy.
12 jeltoqsanda Robınson alǵash ret sot aldyna shyqty. Aıyptaý tarapynan usynylǵan dáleldemelerdiń ishinde Robınsonnyń úıinen tabylǵan jazba bar, onda ol: «Mende Charlı Kırkti joıý múmkindigi bar, men muny jasaımyn», — dep jazǵan. Sonymen qatar, Robınsonnyń bul kisi óltirýdi dostarymen chatta talqylaǵany, al qarýdan onyń DNQ-sy tabylǵany habarlanady. Sondaı-aq, atys jasalǵan shatyrda onyń aıaq kıiminiń izi tabylǵan.