AQSH-ta ólim jazasyna qatysty jańa tolqyn baıqalýda. Beısenbi kúni elde úsh ólim jazasyn oryndaý josparlanǵan edi, solardyń alǵashqysy Oklahoma shtatynda júzege asty. 70 jastaǵy Karlos Kýesta-Rodrıges 2003 jyly zańdy jubaıy Olımpıa Fısherdi óltirgeni úshin ólim jazasyna kesilgen bolatyn. Ol keshirim surap, ókinishin bildirgenimen, apelásıalyq shaǵymdary qabyldanbady. Onyń týystary men dostary jazalaýdan keıin onyń ómirin «qarańǵy jaǵdaılardaǵy erekshe sulýlyq pen náziktik» dep sıpattap, onyń kúndelikti meıirimdiligi men qaıyrymdylyǵyn atap ótti.
Bir saǵattan keıin Tennessı shtatynda 66 jastaǵy Darrell Haıns ólim jazasyna ushyrady. Ol 1985 jyly qonaqúı qyzmetkeri, tórt balanyń anasy Ketrın Djın Djekson Djenkınsti óltirgeni úshin sottalǵan. Onyń advokattary jazany keıinge qaldyrýdy suraǵan, sebebi mamyr aıynda Tennessıde Tonı Karrýterske jasalǵan ıneksıa sátsiz aıaqtalyp, tamyr izdeý uzaqqa sozylǵan edi.
Alabama shtatynda úshinshi ólim jazasy 42 jastaǵy Djeremı Ýılámsqa qatysty josparlanǵan. Ol 2021 jyly Djordjıada bes jasar qyzdy zorlap, óltirgen. Ýıláms kinásin moıyndap, apelásıadan bas tartqandyqtan, onyń isi basqa sottalǵandarǵa qaraǵanda tezirek aıaqtaldy.
Úsh ólim jazasynyń da bir kúnde oryndalýy — sońǵy 15 jyldaǵy alǵashqy jaǵdaı. Bul kezdeısoqtyq bolǵanymen, ólim jazasyn qoldanatyn shtattardaǵy belsendiliktiń artqanyn kórsetedi. Ótken jyly AQSH-ta 47 ólim jazasy oryndaldy, bul aldyńǵy jylmen salystyrǵanda eki ese kóp. Bul ósimniń kóp bóligi Florıda shtatyna tıesili, onda respýblıkashyl gýbernator Ron Desantıs tusynda 19 ólim jazasy oryndaldy.
Úsh jaza da ýkol arqyly oryndalýy tıis, bul ádis 1980 jyldardyń basynan beri qoldanylyp keledi. Alabama shtaty negizinen azot gazyn qoldanýdyń jańa tájirıbelik ádisine kóshken edi, biraq maýsym aıynda federaldy sýdıa bul ádisti konstıtýsıaǵa qaıshy dep toqtatqan bolatyn.