Amerıka Qurama Shtattarynyń Qarýly kúshteri tek jerge jaqyn orbıtada ǵana emes, Aı men onyń aınalasynda da soǵys júrgizýge daıyn bolýy kerek. Bul týraly Birikken shtab bastyqtary komıtetiniń tóraǵasy general Den Keın málimdedi, dep habarlaıdy infohub.kz saıty.
Onyń aıtýynsha, AQSh XXI ǵasyrdaǵy soǵystardy «Aı men onyń aınalasynda» júrgizýge jáne jeńýge daıyn bolýy tıis. General bul málimdemesin Merılend shtatynda ótken avıasıa, ǵarysh jáne kıberqaýipsizdik máselelerine arnalǵan konferensıada jasady.
«AQSh Ǵarysh kúshteri ǵaryshta sózsiz basymdyqty qamtamasyz etip, sondaı-aq birikken kúshterge ǵaryshta jeńiske jetý úshin qajetti jelilerdi, ǵarysh salasyndaǵy ahýaldan habardar bolýdy jáne aqparattyq basymdyqty qoldaýy kerek — qazir de, bolashaqta da», — dep keltiredi onyń sózin The Washington Times.
Birikken shtab bastyqtary komıtetiniń tóraǵasy spýtnıkter ornalasqan ǵarysh keńistigindegi ústemdik qarýly kúshterdiń búkil álem boıynsha baılanys ustaý jáne áreket etý qabileti úshin óte mańyzdy ekenin atap ótti.
Aıta keteıik, birneshe kún buryn AQSh áskerı-áýe kúshteriniń mınıstri Troı Meınk Shtattardyń endi orbıtada ornalastyrylǵan ǵarysh qarýy bar ekenin málimdegen bolatyn. Sonymen qatar, AQSh bolashaqta Golden Dome zymyranǵa qarsy qorǵanys júıesiniń bóligi bolýy tıis ǵarysh zymyrandarynyń jelisin ázirlep jatqany belgili boldy.