Ótken túni amerıkan áskerıleri Iran aýmaǵyndaǵy nysanalarǵa birneshe soqqy berip, 100-ge jýyq nysanany qamtydy. Pentagonnyń Ortalyq qolbasshylyǵy (CENTCOM) shabýyldar Islam revolúsıasy saqshylary korpýsynyń (IRSK) pozısıalaryna, onyń ishinde áýe qorǵanys júıelerine, radıolokasıalyq stansıalarǵa, teńiz ınfraqurylymyna, mına qoıý quraldaryna jáne baılanys toraptaryna baǵyttalǵanyn habarlady, dep habarlaıdy infohub.kz.
CENTCOM-nyń X áleýmettik jelisinde jarıalanǵan resmı málimdemesinde bul soqqylar IRSK-tiń Ormýz buǵazyndaǵy komersıalyq kemeler men amerıkan áskerı qyzmetkerlerine shabýyl jasaý áreketterine jaýap ekeni atap ótilgen. Axios basylymynyń dereginshe, amerıkan sheneýnikteri shabýyl kezinde 100-ge jýyq nysananyń joıylǵanyn rastaǵan.
Sonymen qatar, AQSh áskerıleri osy soqqylar aıasynda Iran úkimetine tıesili eki tankerge de shabýyl jasaǵany habarlanady. Basylymnyń atap ótýinshe, bul — amerıkan áskerıleriniń Irannyń Ormýz buǵazyndaǵy kemelerge shabýylyna jaýap retinde ırandyq tankerlerge soqqy bergen alǵashqy jaǵdaı, buryn mundaı áreketter teńiz blokadasyn buzýǵa jol bermeý maqsatynda ǵana jasalatyn.
Aldyńǵy kúni Iran prezıdenti Masýd Pezeshkıan Bishkekte ótken Shanhaı yntymaqtastyq uıymy (SHYU) samıtinde AQSH-pen tatýlasýǵa qaıta oralý shartyn ataǵan edi. Búgin AQSH-tyń jańa shabýyldary belgili boldy: provınsıalardyń birinde úılený toıyna soqqy berilip, bes adam qaza taýyp, 70-ke jýyq adam jaraqat alǵany habarlanýda. Iran parlamentiniń ulttyq qaýipsizdik jáne syrtqy saıasat jónindegi komıtetiniń tóraǵasy Ebrahım Azızı Tegeran bul shabýyldy jaýapsyz qaldyrmaıtynyn málimdedi.
AQSh prezıdenti Donald Tramp Irandy kelissóz ústeline otyrǵyzýǵa tyryspaıtynyn, óıtkeni qazirgi jaǵdaı oǵan unaıtynyn aıtty.