AQSh pen Iran bir-biriniń kemelerine jaýap soqqylaryn jasady. Bul — bir apta buryn qaıta bastalǵan urys qımyldarynan keıingi shıelenistiń jańa kezeńi. Bir aılyq salystyrmaly tynyshtyqtan soń qaqtyǵys qaıta órshidi. AQSh Ortalyq qolbasshylyǵy (CENTCOM) óziniń X áleýmettik jelisindegi paraqshasynda Irannyń úsh munaı tankerine soqqy jasalǵanyn habarlady. Bul — Islam revolúsıasy saqshylary korpýsynyń (KSIR) eki amerıkandyq áskerı kemege balıstıkalyq zymyran ushyrýyna jaýap retinde jasaldy. «Amerıkandyq avıatasymaldaýshy jáne basqarylatyn zymyrandy esmınes Irannyń kóptegen arandatýshylyq shabýyldarynan sátti qutyldy. Amerıkandyq áskerı qyzmetkerlerdiń eshqaısysy zardap shekken joq. Irannyń sátsiz shabýyldarynan keıin CENTCOM Harg aralynyń jaǵalaýyndaǵy KSIR-diń M/T Downy jáne Djask mańyndaǵy M/T Stark 1 tankerlerin áreketke jaramsyz etti. Amerıkandyq kúshter Oman shyǵanaǵyndaǵy júksiz M/T Kylo („Noksen“ degen atpen belgili) tankerin de tolyǵymen joıdy. Ekıpaj kemeni tastap ketkennen keıin, kemege birneshe mańyzdy núktede soqqy jasalyp, ol paıdalanýǵa jaramsyz boldy», — delingen habarlamada, dep málimdeıdi infohub.kz saıty.
CENTCOM derekteri boıynsha, shabýylǵa ushyraǵan ırandyq munaı tankerleri KSIR men onyń aımaqtaǵy seriktesterin qarjylandyratyn mıllıardtaǵan dollarlyq kóleńkeli jeliniń bóligi bolyp tabylady. Irannyń olardy qorǵaýǵa múmkindigi joq dep málimdenedi. «Islam revolúsıasy saqshylary korpýsyna aıtarymyz anyq bolsyn: eger sender bizdiń eki kememizge oq atsańdar, biz senderdiń úsh kemeńdi joıyp, odan da úlken ekonomıkalyq zalal keltiremiz. Biz amerıkandyq kúshterdi qorǵaýdan tartynbaımyz, qajet bolsa, Irannyń shekteýli jáne osal munaı flotyn joıamyz», — dedi AQSh Ortalyq qolbasshylyǵynyń qolbasshysy Bred Kýper.
VVS-tiń jazýynsha, ırandyq memlekettik BAQ soqqylardy rastap, Tegeran jaýap retinde AQSH-qa qatysty úsh kemege, sondaı-aq Ormýz buǵazy arqyly „ruqsat etilmegen“ baǵytta júzip ótken úsh munaı tankerine shabýyl jasaǵanyn málimdedi. Sonymen qatar, RIA Novostıdiń habarlaýynsha, AQSh soqqylarynan keıin „Hatam ál-Anbıa“ áskerı qolbasshylyǵy ortalyq shtabynyń resmı ókili Ibrahım Zolfaǵarı málimdeme jasady. „Biz AQSh áskerin eskertemiz: eger olar óz zulymdyqtaryn jalǵastyryp, ırandyq kemelerdi qýdalap, olardy qaýip-qaterge ushyratyp, Iranǵa teńiz blokadasyn jalǵastyrsa, Iran qarýly kúshteriniń Taıaý Shyǵystaǵy AQSh áskerı kemelerine soqqylary burynǵydan da kúshti bolady“, — dedi Zolfaǵarı, ony ırandyq Fars agenttigi keltiredi.