Amerıka Qurama Shtattarynyń Kalıfornıa shtatynda New York Times gazetiniń 40 jastaǵy ınjenerlik dırektory Djonatan Makkınzı atyp óltirildi. Kúdikti retinde onyń 77 jastaǵy qaıyn ata-enesi Shoýıýn Chjan men Shılı Chen ustaldy, dep habarlaıdy infohub.kz saıty.
Polısıa málimetinshe, marqum senbi kúni tústen keıin San-Fransıskodan shyǵysqa qaraı 56 shaqyrym jerdegi Dýblın qalasyndaǵy avtoturaqta birneshe oq jaraqatymen tabyldy. Ol gazettiń oıyn oınaýshylar tájirıbesi bóliminiń ınjenerlik dırektory qyzmetin atqarǵan.
Shoýıýn Chjan men Shılı Chenge birinshi dárejeli kisi óltirý sıaqty birneshe aıyp taǵylýda. Erli-zaıyptylardyń advokaty bar-joǵy belgisiz, olar sársenbi kúni aıyptaý qorytyndysyn resmı túrde tanysý úshin sotqa kelýi tıis.
Makkınzıdiń qazasyn New York Times basylymy rastady. Onyń denesi beısenbi kúni tústen keıin saǵat 15:00-de (Grınvıch ýaqytymen 23:00) Dýblın sport alańynyń syrtynan tabylǵan.
San-Fransıskodaǵy KGO-TV telearnasyna kýágerler aldymen birneshe oq dybysyn estigenin, sodan keıin jerde jatqan adamdy kórgenin aıtty.
«Men ol kisiniń jerge qulaǵanyn kórdim: basy men keýdesi qanǵa boıalǵan edi», — dedi kýáger Assad Razavı atalǵan telearnaǵa. Onyń qyzy ákesiniń erli-zaıyptylardy «birge kele jatqanyn, sodan keıin atys bolǵan jerden eshqandaı asyǵyssyz ketip bara jatqanyn» kórgenin qosty.
Erli-zaıyptylardy oqıǵa ornynan ótip bara jatqan polısıa qyzmetkeri birneshe mınýttan keıin ustady. Kýágerdiń aıtýynsha, olar shabýyldan keıin de sol mańda qalyp qoıǵan.
Polısıanyń málimetinshe, Makkınzı oqıǵa ornynda qaza tapty. Polısıa onyń óltirilý sebebin ázirge jarıalaǵan joq.
Qart jup Santa-Rıta túrmesinde ustalyp otyr. Olarǵa sondaı-aq aýyr qylmys jasaýǵa sóz baılasý, abaısyzdyqpen atys qarýyn qasaqana qoldaný jáne balalardyń qaýipsizdigine qater tóndirý aıyptary taǵylýda.