Amerıka Qurama Shtattary orbıtaǵa ornalastyrylǵan ǵaryshtyq baqylaý qarýy bar ekenin alǵash ret resmı túrde rastady. Bul týraly AQSh Áskerı-áýe kúshteriniń mınıstri Troı Meınk málimdedi, dep habarlaıdy infohub.kz saıty.
Defense One basylymynyń habarlaýynsha, málimdeme 14 qyrkúıekte Merılend shtatynda ótken Air, Space & Cyber konferensıasynda jasaldy. DefenseScoop basylymy atap ótkendeı, bul — Pentagon ókiliniń AQSH-tyń tikeleı ǵarysh keńistiginde ornalasqan qarýy baryn alǵash ret jarıa túrde moıyndaýy.
«Búgin biz qaıda paıda bolsa da, ózgermeli qaýip-qaterlerge daıyn bolýdy jalǵastyryp kelemiz. Sondyqtan AQSH-tyń endi orbıtaǵa ornalastyrylǵan, birlesken kúshterdi qarsylastyń dushpandyq áreketterinen qorǵaı alatyn ǵaryshtyq baqylaý qarýy bar», — dedi Meınk.
Mınıstr naqty qandaı júıeler týraly aıtylyp jatqanyn, olardyń ǵaryshta qanshasy bar ekenin jáne qandaı múmkindikterge ıe ekenin naqtylamady. Air & Space Forces Magazine dereginshe, Meınk sóz sońynda tujyrymnyń ádeıi jasalǵanyn jáne «óte jaqsy oılastyrylǵanyn» atap ótti.
Málimdeme sarapshylar arasynda alańdaýshylyq týdyrdy. Secure World Foundation uıymynyń ǵarysh qaýipsizdigi jáne turaqtylyǵy jónindegi dırektory Vıktorıa Semson Vashıngtonnyń moıyndaýy Qytaı men Reseıdi ózderiniń ǵaryshtyq qarýlary týraly ashyq aıtýǵa ıtermeleýi múmkin dep boljady.
Onyń pikirinshe, sóz spýtnıkterdi fızıkalyq túrde joıýǵa jáne ǵarysh qoqysyn jasaýǵa qabiletti kınetıkalyq júıeler týraly emes bolýy yqtımal. Sarapshy AQSh orbıtaǵa radıoelektrondyq kúres jáne sıgnaldardy basý quraldaryn ornalastyrǵan bolýy múmkin dep joramaldady.
Meınk sondaı-aq qyrkúıekte qozǵalystaǵy áýe nysandaryn anyqtaýǵa arnalǵan spýtnıktik júıeniń prototıpterin orbıtaǵa shyǵarý josparlanyp otyrǵanyn habarlady. Sonymen qatar, amerıkandyq Golden Dome qarsy zymyrandyq qorǵanys júıesi úshin ázirlenip jatqan ǵaryshtyq tutqyshtar ushýǵa daıyndyq satysyna jetti.