Nevada shtatyndaǵy Taho kólinde júzýshi áıeldi ózen qundyzy tistep, ol aýrýhanaǵa jetkizilip, jaraqattaryna 38 tigis salynyp, qutyrýǵa qarsy ekpe alǵan. Bul týraly jergilikti BAQ habarlady.
Rıno qalasynyń turǵyny Lınnett Bellın demalys kúni Taho kóliniń Nevada jaǵalaýyndaǵy Hıdden bıch mańynda júzip júrgende, oǵan sý qundyzy shabýyl jasaǵan. «Bir nárse aıaǵymnan ustap, sý astyna tartqanyn sezdim. Onyń kúshi óte zor edi. Adam sıaqty boldy», – dedi Bellın KCRA3 telearnasyna bergen suhbatynda.
«Bul qundyz tisimen de, tyrnaǵymen de maǵan qaraı umtyla berdi. Meniń oıymda tek odan qutylý ǵana boldy. Biraq ol meni qýalaı berdi. Bir kezde odan júzip qashýǵa tyrystym, alaıda ol aıaqtaryma shabýyl jasady», – dep qosty ol.
Aqyrynda Bellın kólden shyǵyp, tastarǵa órmelep, jaıaý júrginshiler jolyna jetkenin aıtty. Alǵashqy kómek qyzmetkerleri ony aýrýhanaǵa jetkizip, medısınalyq kómek kórsetken.
Qundyz shabýyldary sırek kezdesedi, alaıda jabaıy tabıǵat mamandary adamdarǵa bul janýarlardy kórgende olardan aýlaq júrýge keńes beredi. Bul ásirese jaz aıynyń sońynda, qundyzdar óz balalaryn qorǵaıtyn kezde mańyzdy. «Mundaı jaǵdaıdyń bolýy óte sırek», – dedi Nevada shtatynyń jabaıy tabıǵat departamentiniń ókili Kenzı Mardjıott KCRA3-ke.
Alaıda bul Tahoda bir aı ishindegi ekinshi qundyz shabýyly. South Tahoe Now basylymynyń habarlaýynsha, tamyz aıynyń basynda kóldiń Kalıfornıa jaǵalaýyndaǵy Poýp bıch mańynda bir er adam qundyzdyń shabýylyna ushyraǵan. Sol júzýshi de segiz tistelgen jaraqatpen aýrýhanaǵa túsken.