Amerıka Qurama Shtattary Ýkraınany Kaspı qubyr konsorsıýmynyń (KTK) mańyndaǵy kemelerge shabýyl jasaýdan bas tartýǵa kóndirdi. Bul konsorsıým qazaqstandyq munaıdyń álemdik naryqqa eksporty úshin mańyzdy mánge ıe, dep habarlaıdy infohub.kz saıty.
RBK Bloomberg-ke silteme jasap habarlaǵandaı, AQSh ákimshiliginiń ókilderi Ýkraına basshylyǵymen kezdesý ótkizip, onda KTK teńiz termınaly mańyndaǵy kemelerge jasalǵan shabýyldar serıasyna qatysty jaǵdaı talqylandy. Aty atalmaǵan amerıkalyq sheneýniktiń aıtýynsha, ýkraın tarapyn Qara teńizdegi munaı tankerleri men ınfraqurylym nysandaryna, ıaǵnı qazaqstandyq munaı eksporty úshin mańyzdy nysandarǵa shabýyl jasaýdan bas tartýǵa kóndirý múmkin bolǵan.
Materıalda Kıev keme ıeleri aqparat bere alatyn jáne Qara teńiz arqyly qaýipsiz óte alatyn baılanys pýnktterin qurǵany atap ótilgen.
Eske salaıyq, sońǵy shabýyl 30 shildede bolǵan edi. KTK baspasóz qyzmeti sol kezde teńiz termınalynyń akvatorıasynda tankerge jasalǵan shabýyl týraly málimdeme jasap, ony «terorıstik» dep ataǵan. Marshall araldarynyń týyn kótergen Niffos Sifnos tankeri zardap shekkeni habarlanǵan. Júk jóneltýshi — «Teńizshevroıl» JSHS («Shevron» kompanıasy, Qazaqstan). Tanker sol kezde alys ornalasqan bekitý qurylǵysynda munaı tıeý ústinde bolǵan.
Keıin Qazaqstan Energetıka mınıstrligi bolǵan oqıǵaǵa túsinikteme berdi.