Amerıka Qurama Shtattary baspana suraǵan sheteldikterge berilgen 200 myńǵa deıingi vızany joıýdy josparlap otyr. Bul el tarıhyndaǵy eń aýqymdy vıza qaıtaryp alý sharasy bolmaq, dep habarlaıdy infohub.kz saıty.
ABC News derekterine súıensek, Donald Tramp ákimshiligi baspana týraly ótinish bergen nemese alý prosesinde júrgen sheteldikterdiń iskerlik jáne týrısik vızalaryn qaıtaryp alýǵa daıyndalýda. Eger bul júzege assa, mundaı birjolǵy annýlásıa AQSh tarıhyndaǵy eń irisi bolyp, zańdy daýlar týǵyzýy ábden múmkin.
Memlekettik departament aldaǵy aptalarda 2016-2026 jyldar aralyǵynda berilgen B1 jáne B2 sanattaryndaǵy vızalardyń joıylatynyn jarıalaıdy dep kútilýde. Bul sharalar İshki qaýipsizdik mınıstrligimen birlesip júzege asyrylady.
Memlekettik departament ókili Tommı Pıgott: «Biz İshki qaýipsizdik mınıstrligimen birlesip, qysqa merzimdi sapar úshin kelgenin málimdep, keıin turaqty turý úshin baspana suraǵan sheteldikterdiń ımıgrasıalyq emes vızalaryn anyqtap, joıýdy úılestirip jatyrmyz», — dedi.
Vızalardyń joıylýy mindetti túrde dereý deportasıaǵa ákelmeıtinin resmı ókilder atap ótti. Baspana isteri qaralyp jatqan adamdardyń kópshiligi basqa sanatqa aýystyrylady, biraq iskerlik nemese týrısik saıahatshy mártebesinen aıyrylady.