Qazaqstan Ulttyq banki alaıaqtyq belgileri bar tólem operasıalary týraly aqparat jınaýdy keńeıtýdi josparlap otyr. Retteýshi eseptiliktiń jańa nysandaryn engizip, jınalatyn derekterdiń jıiligin arttyrmaq, dep habarlaıdy infohub.kz saıty.
Negizgi jańalyqtardyń biri alaıaqtyq operasıalarǵa qatysty. Ulttyq bank ákimshilik derekterdiń eki jańa nysanyn engizýdi usynady: birinshisinde alaıaqtyq belgileri bar tólem tranzaksıalary týraly málimetter, ekinshisinde — Ulttyq banktiń Antıfrod-ortalyǵy aıasyndaǵy osyndaı operasıalar týraly derekter bolady. Eki nysandy da aı saıyn usyný josparlanýda.
Sonymen qatar, retteýshi elektrondyq termınaldardyń sany, tólem uıymdary operasıalarynyń sany men kólemi, sondaı-aq kiris jáne shyǵys transshekaralyq operasıalar týraly málimetterdi toqsan saıyn emes, aı saıyn jınaýǵa kóshýdi qalaıdy.
Qarjy monıtorıńine qatysty aqparatty da jıi alý josparlanýda. Qylmystyq kiristerdi jylystatýǵa, terorızmdi qarjylandyrýǵa jáne jappaı qyryp-joıatyn qarýdy taratýǵa qarsy is-qımyl sharalary týraly málimetterdi jarty jylda bir ret emes, toqsanyna bir ret usyný usynylady. Klıentterge berilgen táýekel deńgeıleri týraly derekter úshin de osyndaı merzimdilik qarastyrylǵan.
Ulttyq banktegiler ózgeristerdi alaıaqtyq belgileri bar anyqtalǵan tranzaksıalar, onyń ishinde Antıfrod-ortalyq aıasyndaǵy operasıalar boıynsha statısıka jınaý qajettiligimen túsindiredi. Eseptilikti jıi alý aqparattyń jedeldigi men tolyqtyǵyn arttyrýy tıis. Retteýshi talaptardyń saqtalýyn baqylaýdy jaqsartýǵa, táýekelder men aýytqýlardy tezirek anyqtaýǵa jáne qajet bolǵan jaǵdaıda qadaǵalaý sharalaryn qoldanýǵa esepteıdi.
Ázirge bul tek joba. Qujat «Ashyq NQA» portalynda ornalastyrylǵan jáne 1 qyrkúıekke deıin qoǵamdyq talqylaýda bolady.