AQSH-tyń Montana shtatynda qarapaıym taýǵa saıahat tragedıamen aıaqtalýǵa jaqyn qaldy. 32 jastaǵy Devıd Chıfaldi eki dosymen birge shtattaǵy eń bıik shyń – Granıt-Pıkke kóterilip bara jatqan, dep habarlaıdy infohub.kz saıty.
Shyńǵa az qalǵanda er adam súrinip, taıyp ketip qulady. Aýdarylyp túsken Chıfaldi úreılene baıqaǵany, onyń trekkıng taıaqtarynyń biri sol qoltyǵynyń astynan búıirine kirip, arqasynan ótip ketken.
Baqytqa oraı, Chıfaldi medbrat bolyp jumys isteıdi eken. Dúrbeleńdi basyp, ol óz jaǵdaıyn birden baǵalady. Qan az shyqqan, bas aınalmaǵan, ókpesi zaqymdanbaǵan. Taıaq bulshyqetke keptelip, baqytqa oraı ómirlik mańyzdy múshelerge tımegen – olarǵa nebári úsh santımetr qalǵan.
Qymbat qutqarý tikushaǵyn shaqyrtpaý úshin Chıfaldi óz betimen túsýdi jón kórdi. Dostary ony qoldady. Bireýi aldynda kelip, kezdesken týrıserdi eskertse, ekinshisi artynda kelip jarany baqylap otyrdy. Jaǵdaıdy jeńildetý jáne kúızelisten arylý úshin dostar jol boıy ázildesip, tesilip ketken Chıfaldige «Shashlyk» degen laqap berdi.
Túsýge alty saǵat ketti – er adamdar tas pen qar ústimen shamamen 16 shaqyrym jol júrdi. Aldymen Chıfaldini jaqyn mańdaǵy aýrýhanaǵa jetkizdi, biraq ol sol jerden ózi jumys isteıtin emhanaǵa aýystyrýdy surady. Onda dárigerler narkozben jábirlenýshiniń denesinde jeti saǵat turǵan taıaqty uqypty túrde shyǵardy.
Chıfaldi tez arada jazylyp, birneshe kúnnen keıin jumysyna qaıta oraldy. Basynan keshken shokqa qaramastan, ol optımızmin joǵaltpaı, kelesi jyly Granıt-Pıkke qaıta oralyp, shyńǵa shyǵýdy josparlap otyr.
Atap ótetin jaıt, Qazaqstanda adamdar tegin medısınany, jedel járdem qyzmetin nemese evakýasıany jıi baǵalamaıdy. Kópshilik taýǵa esh oılanbastan, arnaıy jabdyqsyz jáne daıyndyqsyz shyǵady, sodan keıin olardy qutqarýǵa tikushaqtar men TJM jasaqtary tartylady. Mundaı evakýasıany shaqyrý memleketke mıllıondaǵan teńgege túsedi, biraq týrıs úshin bul tegin. AQSH-ta kez kelgen aýyr medısınalyq resýrstar men tikushaqtardy tartý astronomıalyq somalarǵa túsedi, sondyqtan adamdar ár qadamyn oılastyryp jasaıdy.
Buǵan deıin «Kýrsıv» basylymy Túrkistan oblysynda 2400 metr bıiktikte týrıs qaza tapqanyn jazǵan. Onyń taýda bógelip, jaǵdaıy nasharlaǵan dosyna qutqarýshylar men TJM tikushaǵynyń kómegi qajet boldy.