Áleýmettik jelide Aqsý qalasy ákiminiń orynbasary Rızagúl Negmanovanyń qaryndasynyń sottylyǵy bar ekeni týraly aqparat tarady. Bul málimetke Pavlodar oblysy ákimdigi túsinik berdi, dep habarlaıdy infohub.kz saıty.
«Prezıdentke hattar» Telegram-arnasynda taraǵan habarlamada Aqsý ákiminiń orynbasary Rızagúl Negmanovanyń týǵan qaryndasy 2023 jyly sybaılas jemqorlyq úshin sottalǵany aıtylǵan. «Sybaılas jemqorlyq týraly» zańǵa sáıkes, jaqyn týysy sottalǵan basshy memlekettik qyzmette jumys isteı almaıdy», — delingen mátinde. QR Memlekettik qyzmet isteri agenttiginen tekserý júrgizip, tıisti sharalar qoldanýdy suraǵan.
NUR.KZ tilshisine Pavlodar oblysy ákimdiginiń habarlaýynsha, Aqsý qalasy ákiminiń orynbasary Rızagúl Negmanova 2009 jyldan beri úzdiksiz memlekettik qyzmette, al qazirgi laýazymynda 27.08.2025 jyldan beri jumys isteıdi.
«Onyń týǵan qaryndasy shynymen de 2023 jyldyń aqpan aıynda qylmystyq jaýapkershilikke tartylǵan. Alaıda zańnama talaptaryna (QR «Memlekettik qyzmet týraly» Zańynyń 2015 jylǵy redaksıasyndaǵy 16, 61-baptary (qyzmetke kirý jáne toqtatý sharttary), qoldanystaǵy redaksıadaǵy 21, 67-baptary), sondaı-aq sybaılas jemqorlyqqa qarsy zańnama talaptaryna sáıkes, jaqyn týystyń sottylyǵy memlekettik qyzmette jumys isteýge kedergi bolyp tabylmaıdy», — dep túsindirdi vedomstvonyń baspasóz qyzmeti.
Jalpy, memlekettik qyzmet týraly zańnamany qoldaný jáne tıisti normalardy túsindirý máseleleri boıynsha oblys ákimdigi QR Memlekettik qyzmet isteri agenttiginiń Pavlodar oblysy boıynsha departamentine júginýdi usyndy, ol osy saladaǵy ýákiletti organ bolyp tabylady.