Aqtaýda kásipker saýda núktesiniń ashylýyna oraı balalarǵa tegin balmuzdaq pen ıogýrt úlestirgeni úshin aıyppul tóledi, dep habarlaıdy infohub.kz saıty.
Oqıǵa 1 tamyzda 14 shaǵyn aýdanynda boldy. Kásipker 50 porsıa balmuzdaq pen 30 ıogýrt taratqan. Aksıadan keıin nysan ıesi ákimshilik jaýapkershilikke tartylyp, 20 AEK mólsherinde aıyppul salyndy, bul 86 500 teńgeni quraıdy.
Qalalyq ákimdik mundaı bastamalarǵa qarsy emes ekenin aıtyp, zań talaptaryn saqtaý qajettigin atap ótti. "Biz kásipkerlerdiń bul baǵyttaǵy bastamalaryna qarsy emespiz. Alaıda ónimdi tegin taratý qoldanystaǵy zańnama talaptaryn saqtaı otyryp júrgizilýi tıis", - dedi ákimdikte.
Vedomstvo mundaı is-sharalardy ótkizý aldynda jergilikti atqarýshy organnan ruqsat alý qajettigin túsindirdi. "Osyndaı is-sharalardy uıymdastyrý aldynda jergilikti atqarýshy organnan tıisti ruqsat alý, sondaı-aq balalardy qýantýdyń basqa da qaýipsiz jáne zańdy joldaryn qarastyrý qajet. Mundaı aksıalar kezinde adamdardyń kóp jınalýy ártúrli jaǵymsyz jaǵdaılarǵa ákelýi múmkin", - dep qosty ákimdik.
Jarıalanymda mundaı aksıalardyń buryn da abyr-sabyrǵa ákelgeni eske salyndy. Máselen, byltyrǵy 1 maýsymda Aqtaýdaǵy Tolqyn-1 shaǵyn aýdanynda balmuzdaq pen maqta kámpıtin tegin taratý abyr-sabyr týdyrǵan edi.
Buǵan deıin Aqtaýda kásipkerdiń ákimdik ruqsatynsyz jappaı is-shara kezinde gúlderdi tegin taratqany úshin aıyppul alǵany habarlanǵan bolatyn.