Aqtaýda bala qaıtys bolǵan soń balalar hırýrgi qamaýǵa alyndy. Mańǵystaý oblysy polısıa departamenti dárigerdiń ustalýyna resmı túsinikteme berdi. Medıkti kásibı mindetterin tıisinshe oryndamady dep kúdiktenip otyr, dep habarlaıdy infohub.kz saıty.
Polısıa dereginshe, oblystyq aýrýhana dárigerleri balany dıagnostıkalaý men emdeý kezinde qatelik jibergen. Naýqastyń jaǵdaıy kúrt nasharlaǵan soń ol sanavıasıamen Almatyǵa jedel jetkizildi. Alaıda dárigerlerdiń áreketine qaramastan balany aman alyp qalý múmkin bolmady — ol aýrýhanada kóz jumdy.
«Komısıalyq sot-medısınalyq saraptama qorytyndysyna sáıkes, kámeletke tolmaǵan balaǵa medısınalyq kómek kórsetý barysynda asqynýlardyń damýyna yqpal etýi múmkin kemshilikter anyqtaldy», — dep keltiredi basylym polısıanyń jaýabyn.
Polısıada sotqa deıingi tergeý jalǵasyp jatqanyn, bolǵan oqıǵanyń barlyq mán-jaıyn anyqtaý úshin sharalar kesheni júrgizilip jatqanyn túsindirdi.
Sonymen qatar Mańǵystaý kópbeıindi aýrýhanasy dırektorynyń orynbasary Úmit İlıasova ustalǵan hırýrgti qoldap shyqty. Bul týraly ol Facebook-tegi paraqshasynda Densaýlyq saqtaý mınıstrligi men İshki ister mınıstrligine joldaǵan úndeýinde jazdy.
«Myńdaǵan balany aman alyp qalǵan balalar hırýrgi ustaldy. Áriptesterdiń aıtýynsha, taǵy basqalaryn da ustamaq. Mańǵystaý oblysynda qaıtadan quqyqtyq ozbyrlyq beleń alyp tur. Aıǵaq berýge shaqyrǵan bolyp, ustap ketti, advokatymyzǵa habarlamady. Ustaýǵa eshqandaı negiz joq», — dep jazdy ol.
Hırýrg beısenbide, 1 qazanda, Qazaqstan Respýblıkasy Qylmystyq kodeksiniń 128-baby (Ustaý negizderi) boıynsha ustalǵany habarlandy. Qazir dáriger tergeý ızolátorynda otyr.