Ақтауда 24 жастағы жүргізуші жаңбырдан кейін су басқан көшеде өз көлігінің төбесінде балық аулауды ұйғарды — соның салдарынан әкімшілік жауапкершілікке тартылды, деп хабарлайды infohub.kz сайты.
Маңғыстау облысы полиция департаментінің баспасөз қызметі нақтылағандай, оқиға 7 қарашада сағат 22:37 шамасында 17 мен 18А шағын аудандары арасындағы автожолда, «Халық Арена» спорт мектебінің жанында болған. Полиция қызметкерлері қоғамдық тәртіпті бұзу фактісін анықтады.
Тексеру барысында Chevrolet Cobalt көлігінің 24 жастағы жүргізушісі бірқатар әкімшілік құқық бұзушылыққа жол бергені анықталды. Осы факті бойынша ер адам Қазақстан Республикасының Әкімшілік құқық бұзушылық туралы кодексінің үш бабы бойынша әкімшілік жауапкершілікке тартылды: 434-баптың 1-бөлігі (ұсақ бұзақылық), 612-баптың 2-бөлігі (көлік құралын басқару құқығы жоқ адамның оны басқаруы) және 590-баптың 9-бөлігі (міндетті техникалық байқаудан өтпеген көлік құралын басқару).
Автомобиль мамандандырылған айыппұл тұрағына қойылды. Ұсақ бұзақылық фактісі бойынша сот шешімімен құқық бұзушыға 86 500 теңге көлемінде әкімшілік айыппұл тағайындалды.
Бұған дейін Маңғыстау облысында алғашқы қар жауғаны белгілі болған. Қар жауын-шашыны бірнеше елді мекенде бірден өтті, ал Ақтауда синоптиктер жаңбыр мен тұман болжаған еді.