Mańǵystaý oblysynda tórt adamnyń ómirin qıǵan jol-kólik oqıǵasy boldy. Oqıǵa faktisi boıynsha qylmystyq is qozǵaldy, dep habarlaıdy infohub.kz saıty.
Mańǵystaý oblystyq polısıa departamentiniń baspasóz qyzmeti naqtylaǵandaı, qaıǵyly oqıǵa 16 qyrkúıekte saǵat 20:30 shamasynda respýblıkalyq mańyzy bar Aqtaý — Beıneý avtojolynda bolǵan. Apatqa eki Toyota Camry markaly kólik qatysqan.
«Aldyn ala derekter boıynsha, Jetibaı aýylynan Shetpe aýylyna qaraı kele jatqan Toyota Camry júrgizýshisi júris bóliginde turǵan túıege soqtyǵysqan. Soqtyǵystan keıin kólik qarsy jolaqqa shyǵyp, qarsy baǵytta kele jatqan Toyota Camry-men soqtyǵysqan», — dedi Mańǵystaý oblystyq polısıa departamentinde.
Jol-kólik oqıǵasy saldarynan tórt adam alǵan jaraqattarynan oqıǵa ornynda qaza tapty. Taǵy tórt adam túrli jaraqatpen medısınalyq mekemege jetkizildi.
Osy fakti boıynsha Qazaqstan Respýblıkasy Qylmystyq kodeksiniń 345-babynyń 4-bóligimen qylmystyq is qozǵaldy. Kólik quraldary arnaıy turaqqa qoıyldy. Qajetti saraptamalar taǵaıyndaldy.
Tergeý jalǵasýda. Oqıǵanyń barlyq mán-jaıy, onyń ishinde janýardyń ıesi anyqtalýda.