Aqtaýda Kaspı teńizi jaǵalaýynda Qazaqstan Respýblıkasy Qarýly kúshteriniń Áskerı-teńiz kúshteri oqý-jattyǵýy kezinde qaza tapqan áskerı qyzmetshilerdiń týystary qalalyq máıithanaǵa kelip, máıitterdi anyqtaýdy talap etti. Oqıǵa ornynan túsirilgen kadrlardy aqtaýlyq bloger Azamat Sarsenbaev jarıalady, dep habarlaıdy infohub.kz saıty.
Bloger Instagram paraqshasynda Aqtaý qalalyq máıithanasynyń janynda qazir bolyp jatqan jaǵdaıdy kórsetti.
«Júzdegen adam, týystar men jaqyndar máıithana kireberisiniń aldyna jınalyp, sarbazdardyń máıitterin anyqtaýdy talap etýde. Qazirgi tańda jergilikti bılik ókilderi qaza tapqan sarbazdardyń máıitterin turǵylyqty jerine jetkizýge daıyndyq júrgizýde (máıitterdi máıithanada tikeleı bermeıdi). Mańǵystaý oblysy ákiminiń orynbasary Ǵalymjan Nıazovtyń ýáde etýinshe, sarbazdardyń máıitteri týystaryna turǵylyqty jerine qysqa merzimde jetkizilip beriledi», — delingen habarlamada.
Qaıǵyly oqıǵa 24 qyrkúıekte Mańǵystaý oblysynda boldy. Qazaqstan Respýblıkasy Qarýly kúshteriniń Áskerı-teńiz kúshteriniń oqý-jattyǵýy barysynda oqý-jaýyngerlik mindetti oryndaý kezinde Kaspı teńiziniń jaǵalaýynda meteorologıalyq jaǵdaıdyń kúrt nasharlaýy men jeldiń kúsheıýi saldarynan áskerı qyzmetshiler teńizge aǵyzylyp ketti.
Qorǵanys mınıstrliginiń aldyn ala málimetinshe, teńizge 19 áskerı qyzmetshi aǵyzylyp ketken. Qazirgi ýaqytta 9 áskerı qyzmetshiniń qaza tapqany tirkeldi. Bas prokýratýra Aqtaý garnızonynda qylmystyq is qozǵalyp, tergelip jatqanyn habarlady.
Áskerı qyzmetshilerdiń qaza tabýynan keıin úkimettik komısıa qurylyp, tótenshe oqıǵa ornyna Premer-mınıstrdiń orynbasary Qanat Bozymbaev jiberildi. Qazaqstan Prezıdenti Qasym-Jomart Toqaev Mańǵystaý oblysynda áskerı qyzmetshilerdiń qaza tabýyna baılanysty kóńil aıtyp, qaıǵyly oqıǵany tergeý jóninde tapsyrmalar berdi.
Aqtaýda qala kúnine oraı merekelik is-sharalar toqtatyldy. Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
24 qyrkúıek keshinde Premer-mınıstrdiń orynbasary Qanat Bozymbaevtyń basshylyǵymen komısıa Mańǵystaý oblysyna keldi.