Internette Aqtaý mańyndaǵy Kaspı teńizine jasalǵan qaýipti sekirýdiń vıdeosy paıda boldy, dep habarlaıdy infohub.kz saıty.
Kadrlarda er adam jardan teńizge sekirip, keıin qatty tolqyndardyń tuzaǵyna túskeni kórinedi. Qutylýǵa tyrysyp, jaǵaǵa qaraı júzedi, biraq tolqyndar ony tastarǵa qaraı alyp ketedi. Bolǵan oqıǵany kýágerler baqylap tur. Olar aldymen oǵan qutqarý dóńgelegin laqtyrýdy suraıdy, sodan keıin qol berýdi ótinedi. Bir sátte kelesi tolqyn ony tasqa shyǵaryp tastaıdy, osynyń arqasynda ol ózdiginen jaǵaǵa shyǵady.
«Mine, jyndy balalar», — deıdi vıdeo avtory. Paıdalanýshylardy bolǵan oqıǵa alańdatty. «Nege taǵdyryńdy synaısyń?», «Ol basymen tasqa soǵylýy múmkin edi, sodan keıin denesin shyǵaryp kór», «Aıyppul salsyn!» — dep jazady pikir qaldyrýshylar.
Mańǵystaý oblysy Tótenshe jaǵdaılar departamenti post astynda vıdeo Aqtaýdan shamamen 43 shaqyrym jerdegi shomylýǵa tyıym salynǵan jerde túsirilgenin habarlady. «Mundaı jerlerde shomylý jáne tolqynǵa sekirý Qazaqstan Respýblıkasynyń qoldanystaǵy zańnamasyna sáıkes ákimshilik jaýapkershilikke ákep soǵady jáne aıyppul salýǵa negiz bolady», — dep atap ótti vedomstvoda.
Degenmen, óńirlik TJ departamentiniń qosýynsha, eń bastysy — aıyppul emes. Ár adam óz ómiri men densaýlyǵy úshin jaýapty. Qysqa merzimdi táýekel orny tolmas apatqa ákelýi múmkin. Vedomstvo qaýipsizdik erejelerin saqtaýǵa jáne tek ruqsat etilgen, jabdyqtalǵan jaǵajaılarda demalýǵa shaqyrdy.