Aqtaýda apat boldy: kater jartasqa soǵylyp, eki adam qaza tapty. Qutqarýshylar operasıa barysy týraly aıtyp berdi, dep habarlaıdy infohub.kz.
Mańǵystaý oblystyq TJD tótenshe jaǵdaılardy joıý basqarmasynyń bastyǵy Baqytjan Ósenovtiń aıtýynsha, keme teńizden shyǵyp turǵan jartas bóligine soǵylǵan. Borttaǵy jeti adamnyń barlyǵy sýǵa túsip, ártúrli dárejedegi jaraqat alǵan.
İzdeý-qutqarý jumystary túngi ýaqytta júrgizildi, bul tapsyrmany aıtarlyqtaı qıyndatty. Kóp uzamaı sýǵa batqan kater túbinen tabyldy. TJD qyzmetkerleri zardap shekken bes adamdy sýdan shyǵardy. Taǵy ekeýin izdeý uzaqqa sozyldy: olar jaǵadan shamamen 500 metr qashyqtyqta tabyldy. Ekeýiniń de qutqarý keýdeshesin kımegeni anyqtaldy.
Sońǵy zardap shegýshini sýdan 02:34-te shyǵardy. Ókinishke qaraı, eki adam qaıtys boldy.
Sonymen qatar, Aqtaýdaǵy kater jaldaýmen aınalysatyn kásipkerler Instagram-da úndeý jazyp, synǵan kemeniń ekskýrsıalyq emes ekenin atap ótti. «Bul katerdiń bizge esh qatysy joq. Bul biz qonaqtar men týrıserge jalǵa beretin serýendik kater emes. Katerdegi adamdar — týystar, bir otbasy. Meniń túsinýimshe, olar katerdi sýǵa túsirip, ózderi serýendegisi kelgen. Ony komersıalyq maqsatta paıdalanbaǵan. Ókinishke qaraı, kater ıesi de osy apatta qaza tapty. Teńiz qatelikterdi keshirmeıdi. Ártúrli qaýesetterge senbeý kerek. Bul jalǵa alynǵan emes, olardyń jeke kateri edi», — dedi olar.
Eske salaıyq, 30 tamyzda Kaspı teńiziniń akvatorıasynda bortta jeti adam bolǵan serýendik kater jartasqa soǵylǵan edi. Eki adam qaza tapty. Keıin dárigerler zardap shekkenderdiń jaǵdaıy týraly habarlady: «Tórt zardap shegýshige deneniń birneshe aımaǵynyń ártúrli jaraqattary dıagnoz qoıyldy. Qazir tórteýi de aýrýhanaǵa jatqyzyldy. 1988, 2002 jáne 1964 jyly týǵan naýqastar reanımasıa bólimine jatqyzyldy. Olardyń jaǵdaıy aýyr, dárigerlerdiń turaqty baqylaýynda».