Aqtaý turǵyny lıposaksıadan keıin týyndaǵan aýyr asqynýlarǵa baılanysty sotqa júgindi. Tekserý barysynda klınıkada birqatar buzýshylyqtar anyqtaldy, dep habarlaıdy infohub.kz.
Aqtaý turǵyny jeke klınıkada jasalǵan lıposaksıadan keıin azamattyq talap-aryzben sotqa júgindi. Medısınalyq jáne farmasevtıkalyq baqylaý komıtetiniń aýmaqtyq departamenti júrgizgen tekserý birqatar buzýshylyqtardy, onyń ishinde hırýrgıalyq operasıalardy júrgizýge lısenzıanyń joqtyǵyn anyqtady.
Jospardan tys tekserý nátıjelerin Mańǵystaý oblysy boıynsha Medısınalyq jáne farmasevtıkalyq baqylaý komıteti departamentiniń basshysy Nursulý Muhambetárova jarıa etti.
«Tekserý nátıjeleri boıynsha birqatar buzýshylyqtar anyqtaldy — hırýrgıalyq kómek standarttaryn saqtamaý, lısenzıalaý normalaryn buzý jáne merzimi ótken dárilik zattardy qoldaný. Tekserý kezinde klınıkada jaramdylyq merzimi sáýirde aıaqtalǵan dárilerdiń bolýy anyqtaldy. Buzýshylyqtardy joıý úshin bir aı merzim berildi», — dedi Nursulý Muhambetárova.
Tekserý qorytyndysy boıynsha medısınalyq mekeme basshylyǵyna lısenzıalaý normalaryn buzǵany, medısınalyq kómek kórsetý standarttaryn saqtamaǵany jáne farmasevtıkalyq qyzmet erejelerin buzǵany úshin ákimshilik hattamalar jasaldy. Aıyppuldardyń jalpy somasy shamamen 700 myń teńgeni qurady.
Departament basshysynyń túsindirýinshe, klınıkanyń plasıkalyq hırýrgıa salasynda tek ambýlatorıalyq-emhanalyq kómekke lısenzıasy bolǵan. Bul konsýltasıalar ótkizýge múmkindik bergen, alaıda hırýrgıalyq operasıalardy jasaýǵa quqyq bermegen.
«Klınıkada „Eresek turǵyndarǵa stasıonardy almastyratyn medısınalyq kómek — plasıkalyq hırýrgıa“ beıini boıynsha medısınalyq qyzmetti júzege asyrýǵa lısenzıaǵa qosymsha joq. Medısınalyq qujattamaǵa, mamandardyń túsiniktemelerine jáne jospardan tys tekserýge tartylǵan táýelsiz sarapshynyń qorytyndysyna sáıkes, kórsetilgen medısınalyq kómek Qazaqstan Respýblıkasynyń qoldanystaǵy hırýrgıalyq jáne anestezıologıalyq kómek standarttaryna sáıkes kelmegen. Hırýrgıalyq tehnıkanyń tómen sapasy men operasıadan keıingi kútimniń jetkiliksizdigi asqynýdyń — ish aldyńǵy qabyrǵasynyń flegmonasynyń damýymen tikeleı sebep-saldarlyq baılanysta ekeni anyqtaldy», — delingen pasıent Kamıla Nurjan bólisken tekserý materıaldarynda.
Tekserý aktisi quqyqtyq baǵalaý úshin Mańǵystaý oblysynyń polısıa departamentine jiberildi. Sonymen qatar, qujat operasıalyq blok pen reanımasıa bólimshesiniń sanıtarlyq talaptarǵa sáıkestigin tekserý úshin sanıtarlyq-epıdemıologıalyq baqylaý departamentine berildi.
Kamıla Nurjannyń ózi polısıaǵa júginip, materıaldyq jáne moraldyq zıandy óteýdi talap etip, azamattyq talap-aryz bergenin habarlady.
«Qazir emdelý men qalpyna kelýdi jalǵastyryp jatyrmyn. Operasıa men aýyr qabyný prosesinen keıin aǵza qatty álsiredi, gemoglobın deńgeıi 83 birlikke deıin tómendedi. Taǵaıyndalǵan emdi qabyldap, qan kórsetkishterin qalpyna keltirip, dárigerlerdiń baqylaýyndamyn. Operasıanyń saldary áli de baıqalady, sondyqtan qalpyna kelý prosesi áli aıaqtalǵan joq. Kórinetin tyrtyqtar qaldy, iriń áli de bar. Al klınıka Instagram akkaýntyn aýystyryp, jumysyn jalǵastyrýda», — dedi ol.
Buǵan deıin Kamıla Nurjan Aqtaýdaǵy jeke klınıkalardyń birinde lıposaksıadan keıin aýyr irińdi qabynýmen shuǵyl túrde aýrýhanaǵa jatqyzylǵanyn málimdegen.