Aktaýda emdelýshilerge Qazaqstanda tirkelmegen dárilerdi egip kelgen medısınalyq ortalyqtyń qyzmeti toqtatyldy. Jospardan tys tekserý kezinde kúmándi quramdaǵy saýyqtyrý tamshylatqyshtary anyqtaldy. Mamandar 240-qa jýyq dárilik zatty tárkiledi, dep habarlaıdy inbusiness.kz.
Tekserýge sebep bolǵan – oblystyq farmasevtıkalyq baqylaý departamentine bir áıeldiń shaǵymy. Bir prosedýradan keıin ol nátıjege kóńili tolmaı, aqshany qaıtarýdy talap etken, biraq bas tartylǵan. Tekserý barysynda eki prosedýralyq kabınette emdelýshilerge memlekettik tirkeýden ótpegen, sapa men qaýipsizdik sertıfıkattary joq dárilermen saýyqtyrý jáne jasarý tamshylatqyshtary jasalǵany anyqtaldy. Sot medısınalyq mekemege 600 myń teńgeden astam aıyppul salyp, qyzmetin bir aıǵa toqtatty.
«Uıym sulýlyq salony retinde jumys istep, densaýlyqty nyǵaıtý qyzmetin jarnamalaǵan. Atalǵan mekemedegi medısına qyzmetkerleri lısenzıasyz jumys istegen. Osyǵan baılanysty Departament qosymsha ákimshilik aıyppul saldy», – dedi Qazaqstan Respýblıkasy Densaýlyq saqtaý mınıstrligi Medısınalyq jáne farmasevtıkalyq baqylaý komıteti departamenti basshysynyń orynbasary Erlan Tólepbergen.