Ақтаудағы әкімшілік құқық бұзушылықтар жөніндегі мамандандырылған сот лицейдің бұрынғы мұғаліміне қатысты істі қарады. Ол осы жылдың қазанында мектептің техникалық қызметкерімен жанжалдасып, су толы шелекті тепкен, деп хабарлайды infohub.kz сайты.
Маңғыстау облысы соттарының ресми Telegram-арнасында жазылғандай, іс Қазақстан Республикасы Әкімшілік құқық бұзушылық туралы кодексінің 434-бабының 1-бөлігі — «Ұсақ бұзақылық» бойынша қаралды.
Сот анықтағандай, осы жылдың қазанында әйел мектеп-лицейдің екінші қабатында болған. Жәбірленуші сол жерде тазалық жұмыстарын жүргізіп жатқан. Әйел шелекті әдейі аяғымен тепкен, салдарынан ол аударылып қалған. Содан кейін қоғамдық тәртіпті бұзуға бағытталған әрекетін жалғастырып, жәбірленушіні балағаттаған. Осылайша ұсақ бұзақылық жасаған.
Сот отырысында құқық бұзушы кінәсін мойындады. Ол былай деп түсіндірді: былайғы сөздер айтпаған, тек ашуға беріліп, шелекті тепкен.
Әйелдің кінәсі әкімшілік құқық бұзушылық туралы хаттамамен, жәбірленушінің арызымен, сондай-ақ іс материалдарына заттай дәлел ретінде қосылған бейнежазбамен толық дәлелденді.
ӘҚБтК-нің 434-бабының 1-бөлігінің санкциясы 20 айлық есептік көрсеткіш мөлшерінде айыппұл салуды, не 20-дан 60 сағатқа дейінгі мерзімге қоғамдық жұмыстарға тартуды, не 5-тен 15 тәулікке дейінгі мерзімге әкімшілік қамауға алуды көздейді.
Қаулы шығару кезінде сот кінәні мойындауды және кәмелетке толмаған балалардың асырауында болуын ескерді.
Сот қаулысымен әйел Қазақстан Республикасы ӘҚБтК-нің 434-бабының 1-бөлігі бойынша кінәлі деп танылып, оған 20 айлық есептік көрсеткіш мөлшерінде — 86 500 теңге айыппұл түріндегі әкімшілік жаза тағайындалды.
Сот қаулысы заңды күшіне енген жоқ.
Бұған дейін әлеуметтік желілерде Ақтау мектептерінің бірінің бейнебақылау камерасынан түсірілген видео пайда болған. Жазбада мұғалім мектептің техникалық қызметкерімен жанжалдасып, шелекті тепкені, одан кейін айналаға су төгілгені көрінеді.
Мұғалім лицей директорының жұбайы, ал техникалық қызметкер бұрын оның үй шаруасындағы көмекшісі болғаны хабарланған. Оқиғадан кейін педагог лайықсыз мінез-құлқы үшін жұмыстан шығарылды. Оның өзі жанжал техникалық қызметкер ол туралы өсек таратқанынан туындағанын айтқан.