Aqtaýda keıbir mektepterde sabaq keshki segizden keıin aıaqtalatynyna ata-analar narazylyq bildirýde. Bul jaǵdaıǵa qalalyq bilim bólimi túsinikteme berdi, dep habarlaıdy infohub.kz saıty.
Jarıalanǵan kestege sáıkes, ekinshi aýysymdaǵy sońǵy jetinshi sabaq 20:05-te aıaqtalady. Aqtaý qalalyq bilim bólimi tárbıe isi jónindegi sektor meńgerýshisi Gaýhar Tileýqulova keıbir mektepterde ekinshi aýysymnyń sońǵy sabaǵy shynymen osy ýaqytta aıaqtalatynyn rastady. Ol sabaqtyń aıaqtalý ýaqyty oqý júktemesi men jasalǵan kestege baılanysty ekenin túsindirdi.
Aqtaýda barlyǵy 36 memlekettik jalpy bilim beretin mektep bar. Onyń 35-i eki aýysymda jumys isteıdi, al №31 mektepte oqý prosesi úsh aýysymda uıymdastyrylǵan. Gaýhar Tileýqulova ekinshi jáne úshinshi toqsandarda sabaq uzaqtyǵy 45 mınýttan 40 mınýtqa qysqaratynyn jetkizdi. Bul ekinshi aýysymda oqıtyn oqýshylardyń úıge qaıtý ýaqytyn qysqartýǵa múmkindik beredi.
Sondaı-aq, sheneýnik basqa mektepterde úshinshi aýysymdy engizý múmkindigine túsinikteme berdi. Ol qazirgi ýaqytta úsh aýysymdy oqytý tek №31 mektepte (17 shaǵyn aýdan) oqýshylar sanynyń kóptigine baılanysty uıymdastyrylǵanyn atap ótti. Qalanyń qalǵan mektepterinde úshinshi aýysymdy engizý josparlanbaǵan.