Aqtaýda jergilikti turǵyn qoǵamdyq oryndy lastaǵany úshin jaýapkershilikke tartyldy. Oqıǵa 2026 jyldyń tamyz aıynda bolǵan. Er adam 17 shaǵyn aýdandaǵy №99 úıdiń janyna pırotehnıkalyq buıymdardyń qaldyqtaryn tastaǵan, dep habarlaıdy infohub.kz saıty.
Mańǵystaý oblysy sottarynyń resmı Telegram-arnasynda habarlanǵandaı, is Qazaqstan Respýblıkasy Ákimshilik quqyq buzýshylyq týraly kodeksiniń 434-2-babynyń 1-bóligi boıynsha qaraldy. Azamat N. belgilenbegen jerge komýnaldyq qaldyqtardy tastaý, ıaǵnı ortaq paıdalaný oryndaryn lastaǵany úshin kináli dep tanyldy.
Sot otyrysynda N. óz kinásin moıyndap, budan bylaı mundaı buzýshylyqtarǵa jol bermeıtinin aıtyp, sottan qatań jaza taǵaıyndamaýdy surady. Quqyq buzýshynyń kinási ákimshilik quqyq buzýshylyq týraly hattamamen, jaýap alý hattamasymen jáne is materıaldaryna qosa tirkelgen beınejazbamen tolyq dáleldendi.
QR ÁQBtK-niń 434-2-babynyń 1-bóligine sáıkes, mundaı quqyq buzýshylyq úshin on aılyq eseptik kórsetkish mólsherinde aıyppul nemese qyryq saǵatqa deıingi merzimge qoǵamdyq jumystarǵa tartý jazasy qarastyrylǵan. Sot kináni tolyq moıyndaýdy, turaqty jumys ornynyń bolmaýyn jáne quqyq buzýshylyqtyń alǵash ret jasalǵanyn eskerip, N.-ǵa qysqartylǵan tártipte 30 275 teńge kóleminde ákimshilik aıyppul taǵaıyndady.
Sot qaýlysy zańdy kúshine engen joq.