Aqtaýda mas kúıinde kólik basqarǵany úshin ustalǵan áıel ákimshilik qamaýdan qutylý úshin sotqa jalǵan júktilik týraly medısınalyq anyqtama usynǵan. Bul týraly infohub.kz saıty habarlaıdy.
Mańǵystaý oblystyq prokýratýrasynyń málimetinshe, polısıa qyzmetkerleri áıeldi mas kúıinde kólik júrgizip bara jatqan jerinen toqtatqan. Bul quqyq buzýshylyq úshin Qazaqstan Respýblıkasynyń Ákimshilik quqyq buzýshylyq týraly kodeksinde 15 táýlikke qamaýǵa alý jáne kólik quralyn basqarý quqyǵynan 7 jylǵa aıyrý jazasy qarastyrylǵan.
İsti qaraý barysynda buzýshy sotqa júktiligin rastaıtyn medısınalyq qujat usynǵan. Osy anyqtamanyń negizinde sot ony ákimshilik qamaýdan bosatyp, tek qosymsha jaza – júrgizýshi kýáliginen 7 jylǵa aıyrý jazasyn taǵaıyndaǵan.
Alaıda Aqtaý prokýratýrasy júrgizgen tekserý usynylǵan anyqtamanyń jalǵan ekenin anyqtady. Prokýrordyń narazylyǵy boıynsha Mańǵystaý oblystyq soty birinshi satydaǵy sottyń qaýlysyn ózgertip, 15 táýlikke qamaýǵa alý jazasyn taǵaıyndady.
Medısınalyq qujatty jalǵan jasaý jáne ony paıdalaný faktileri boıynsha medısına qyzmetkeri men áıelge qatysty Qazaqstan Respýblıkasynyń Qylmystyq kodeksiniń 385-baby boıynsha qylmystyq is qozǵaldy.