Aqtaýdaǵy úlken turǵyn úı kesheniniń turǵyndary 40 gradýstyq aptapta qurylys salýshynyń qateliginen elektr qýatynyń úzilýi saldarynan sýsyz qalyp otyr. Halyq jaǵdaıdy túzetýdi talap etedi, dep habarlaıdy infohub.kz saıty.
Turǵyndardyń aıtýynsha, shilde aıyndaǵy aptapta, temperatýra +40 gradýsqa jýyqtaǵanda, shamadan tys júkteme saldarynan elektr qýaty óshedi. Elektr bolmaǵan soń aýyz sý men lıft jumysy toqtaıdy. «Jaryq óshse, sýymyz bolmaıdy. Sebebi qazir kópqabatty úılerdiń barlyǵynda sý sorǵyshtar arqyly beriledi. Al elektr bolmaǵandyqtan sý berilýi toqtaıdy. Joǵarǵy qabattar sýsyz qalady. Eń birinshi ótinish: elektr máselesin retteńiz», — deıdi turǵyn Asyl Aldabergenqyzy.
Turǵyn úı kesheninde 800 páter jáne shamamen 1,5 myń turǵyn bar, onyń ishinde balalar men qarttar da bar. Kópshiligi úıden shyqpaýdy jón kóredi, sebebi joǵarǵy qabattarǵa jaıaý kóterilýge týra keledi. Qyzmet kórsetý kompanıasynyń basshysy Merýert Kosherbaeva málimdedi: «Jaz bastalysymen elektr úzdiksiz óshedi. Aýyz sý sorǵyshtary jumysyn toqtatady. Sodan keıin lıft toqtaıdy. Jaz bastalǵannan beri osy óshirýler saldarynan bizdiń tórt sorǵyshymyz kúıip ketti. Biz olardy jóndep, qaıta ornatamyz. Biraq osylaı jalǵasa berse, barlyq jabdyq isten shyǵady».
Turǵyndar tórt jyl buryn úıdi paıdalanýǵa bergen qurylys salýshy áli kúnge deıin elektrmen jabdyqtaý kompanıasyna qajetti qujattardy tapsyrmaǵandyqtan, jeliler ıesiz bolyp sanalady dep málimdeıdi. Quzyrly organdarǵa ujymdyq ótinish nátıje bermegen. Ákimdik óshirýdiń negizgi sebebi — elektr jelisine shamadan tys júkteme jáne rezervtik kabeldiń joqtyǵy ekenin túsindirdi. Aqtaý qalasy ákimdiginiń TKSh bóliminiń bas mamany Aset Baspaev: «Qurylys uıymy óz ýaqytynda eki kabel tartýy kerek edi. Alaıda qazirgi tańda munda tek bireýi ǵana bar. Iaǵnı rezervtik kabel joq. Sondyqtan óshirý bolǵan jaǵdaıda qalpyna keltirý jumystary belgili bir ýaqyt alady. Kabel jelileri satyp alyndy. Qala boıynsha kezektilikke sáıkes olardy tartý jumystary júrgizilýde», — dep túsindirdi. Jumystardyń naqty aıaqtalý merzimi aıtylmady, biraq bir apta ishinde bastaýǵa ýáde berdi.