Aqtaýda qala jaǵalaýynda qyzǵa zorlaý qaýpin tóndirgen er adamǵa qatysty úkim shyqty. Oqıǵa 2 tamyzda bolǵan, agressıvti qala turǵyny jolaýshy qyzǵa shabýyl jasaǵan, dep habarlaıdy infohub.kz saıty.
Aqtaý qalasynyń Ákimshilik quqyq buzýshylyqtar jónindegi mamandandyrylǵan sotynyń baspasóz qyzmetinen málim etkendeı, is búgin qaraldy. Jelide jarıalanǵan vıdeolarda er adamnyń aq pıdjak kıgen qyzdy ustap turyp, onyń bosanyp shyǵýǵa tyrysqany kórinedi. Ótip bara jatqandar janjalǵa aralasqan, alaıda ekinshi vıdeoda kúdikti «Men seni zorlaımyn» dep qorqytýyn jalǵastyrady.
Sot otyrysy barysynda quqyq buzýshy kinásin tolyq moıyndady. Sotta onyń kinási polısıa qyzmetkeriniń raportymen, ákimshilik quqyq buzýshylyq týraly hattamamen, №9649 medısınalyq kýálandyrý qorytyndysymen jáne oqıǵa ornyndaǵy beınejazbamen rastalǵany atap ótildi.
Er adamnyń áreketteri QR ÁQBtK-niń 434-babynyń 2-bóligine (usaq buzaqylyq) sáıkes saralanǵan, ol 60-tan 100 saǵatqa deıingi merzimge qoǵamdyq jumystarǵa tartý nemese 15-ten 30 táýlikke deıingi merzimge ákimshilik qamaýǵa alý jazasyn kózdeıdi. Sot quqyq buzýshyǵa eń joǵary jazany – 30 táýlik qamaýdy taǵaıyndady. Qaýly áli zańdy kúshine engen joq.