Aqtaýlyq 9 jasar bala tis emdeýden keıin asqynýlar paıda bolyp, qazir Astanada em alyp jatyr. Anasynyń aıtýynsha, bala tis emdetken soń asqynýlar bastalǵan. Otbasy tergeý júrgizýdi talap etedi, dep infohub.kz habarlaıdy.
Basylymnyń dereginshe, balany 2026 jylǵy aqpanda profılaktıkalyq tekserýge ákelgen. Bala eshqandaı aýyrsynýǵa shaǵymdanbaǵan. Anasy Aqmaral Qaljanovanyń aıtýynsha, emdeýshi dáriger aldyn ala rentgendik tekserýsiz balaǵa jansyzdandyrýmen emdeýdi taǵaıyndaǵan. Áıeldiń kabınetke kirýine medısınalyq mekemeniń ishki erejelerin alǵa tartyp ruqsat bermegen.
Prosedýradan keıin tisti plombamen jappaǵan, al qaıta qabyldaýdy eki aptadan keıin belgilegen. Keıinirek qujattarda emdeý aıaqtaldy dep kórsetilgeni anyqtaldy. Otbasy qaıta qabyldaýǵa kelgende, basqa dáriger elektrondy derekter bazasynda aldyńǵy qabyldaý týraly aqparatty tappaǵan.
Anasynyń aıtýynsha, keıin balaǵa birneshe ret myshák pastasyn salǵan, sodan keıin qatty aýyrsyný men bettiń isinýi paıda bolǵan, keıin irińdi-qabyný prosesi damyǵan. Astanada balaǵa tómengi jaq súıeginiń osteomıelıti jáne sekvestry dıagnozy qoıylǵan. Eki operasıa kezinde dárigerler shamamen 15 gram joıylǵan súıek tinin alyp tastaǵan.
Qazir bala Astanada emdelýin jalǵastyrýda. Anasynyń sózinshe, jaq súıeginiń 60–70 paıyzy buzylǵan, alda taǵy bir operasıa kútip tur. «Biz áli de Astanadamyz, em men fızıoterapıa prosedýralarynan ótip jatyrmyz. Eń ókinishtisi, kináliler ulymnyń jaǵdaıyna múlde qyzyqpaıdy. Men buny jazasyz qaldyrǵym kelmeıdi», – dedi áıel.
Mańǵystaý oblysy densaýlyq saqtaý basqarmasy otbasynyń shaǵymynan keıin medısınalyq kómek sapasyna ishki aýdıt júrgizip, qujattardy teksergeni týraly habarlady. Qyzmettik tergeý men hattamalyq keńes qorytyndysy boıynsha jiberilgen buzýshylyqtar úshin tis dárigerleri E. Qasıraeva men M. Murzaǵulovaǵa sógis túrindegi tártiptik shara qoldanylǵan. Otbasy bul sheshimmen kelispeı, Mańǵystaý oblysy polısıa departamentine aryzdanǵan, olar aryzdy tirkep, sotqa deıingi tergeý júrgizýdi talap etedi.