2026 jyldyń basynan beri Aqtóbe oblysy polısıasyna adamdardyń habarsyz ketýi týraly 900-den astam habarlama kelip túsken. Onyń ishinde 470-i kámeletke tolmaǵandarǵa qatysty bolǵan, dep habarlaıdy infohub.kz saıty.
Belsendi izdeý sharalarynyń nátıjesinde habarsyz ketkenderdiń barlyǵy derlik tabylyp, úılerine oralǵan. Qazirgi tańda úsh adamnyń qaıda ekeni belgisiz – olardy izdeý jalǵasýda. Polısıa málimeti boıynsha, eresekter kóbinese týystaryna eskertpeı jumysqa ketip qalady nemese turǵylyqty jerlerin aýystyryp, baılanysqa shyqpaıdy. Al kámeletke tolmaǵandar otbasyndaǵy janjaldar men ata-analarymen túsinispeýshilik saldarynan nemese saldaryn oılamastan úıden ketedi.
Qazirgi ýaqytta polısıa 44 jastaǵy eki er adam men bir zeınetkerdi: Asylhan Hasenovty, Sergeı Kovtýndy jáne Bolat Qońyrbaevty izdestirýde. Árbir joǵalǵan adam boıynsha izdeý toptary qurylǵan. Polıseıler týystary men kýágerlerden jaýap alyp, beınebaqylaý kameralarynyń jazbalaryn tekseredi, joǵalǵandardyń bolýy múmkin jerlerdi qarap, syrtqy kúzet qyzmetin jumyldyryp, eriktilermen birlesip jumys isteıdi. Qajet bolǵan jaǵdaıda izdeý jumystary oblys aýmaǵynan tys jerlerde de júrgiziledi. İzdelip jatqan adamdar týraly aqparaty bar azamattar 102 nómirine habarlasýǵa nemese jaqyn mańdaǵy polısıa bólimine júginýge shaqyrylady.