Aqtóbe oblysynda káriz qurylysyna aqsha jınap alyp, jumysty bastamaǵan merdigerge qatysty qylmystyq is qozǵaldy, dep habarlaıdy infohub.kz saıty.
Aqtóbedegi jeke sektor turǵyndary eki jyl buryn aýdandaryna káriz júıesin salýy tıis merdigerge júgingen. Qala turǵyndarynyń aıtýynsha, olar ondaǵan jyldar boıy septık qoldanyp, aıyna tórt retke deıin 8 myń teńgeden sorǵyzý aqysyn tóleýge májbúr bolǵan. Eki jyl buryn turǵyndar kópjyldyq máseleni sheshemiz dep ýáde bergen kompanıaǵa júgingen. 28 úıdiń árqaısysynan 300 myń teńgeden jınalǵan, alaıda jóndeý jumystary bastalmaǵan.
«Aqshany bizden talap etti. Munda kim turatynyn kórip tursyz ba? Zeınetkerler kóp. Bul 300 myńdy nesıege aldyq. Al ol eki jyl boıy ýáde berdi. Kún saıyn! Traktor kele jatyr — bárimiz dalaǵa shyǵamyz, traktor kele jatyr! Qubyrlardy da ákeldi, úsh qubyr ákeldi. Ol bizge kún saıyn ótirik aıtty!» — deıdi Aqtóbe turǵyny Záýresh Imjarova.
Turǵyndar polısıaǵa aryzdanǵan. Turǵyndardyń esebi boıynsha, keltirilgen shyǵyn 9 mln teńgege jýyq. Quqyq qorǵaý organdary qylmystyq is qozǵady.
«Atalǵan fakti boıynsha QR QK 190-baby "Alaıaqtyq" boıynsha qylmystyq is qozǵaldy. Qazirgi ýaqytta dáleldemelerdi bekitýge baǵyttalǵan qajetti tergeý áreketteriniń kesheni júrgizilýde. Tergeý áreketteriniń nátıjeleri boıynsha zańdy sheshim qabyldanatyn bolady», — dedi Aqtóbe oblysy polısıa departamenti baspasóz qyzmetiniń jetekshisi Erbolat Sarqulov.