Qorǵanys mınıstrliginiń áskerı qyzmetshileri Aqtóbe oblysyndaǵy sý basqan 403 gektar aýmaqty dezınfeksıalady, dep habarlaıdy infohub.kz saıty.
Ortalyq komýnıkasıalar qyzmetindegi brıfıńte Tótenshe jaǵdaılar mınıstrliginiń (TJM) ókili Asqar Shárip sý tasqyny jaǵdaıy boıynsha jańa derekterdi jarıalady. «Atyraý, Inder, Mahambet, Isataı jáne Qurmanǵazy aýdandarynda 500 km-den astam bóget salyndy. Qulsaryda sý basqan aýmaqtardan jyljymaly sorǵy stansıalary men motopompalardyń kómegimen 207 myń tekshe metrden astam sý soryldy. Respýblıka boıynsha 38 521 adam úıine qaıtty. Evakýasıalyq pýnktterde 6 726 adam qalyp otyr», — dep spıkerdiń sózin Kazinform tilshisi keltirdi.
Ol sý tasqyny bastalǵannan beri 12,9 mln tekshe metrden astam erigen sý sorylǵanyn, 7 mln meshkotar jáne 1,5 mln tonna ınertti materıal tóselgenin qosty.
Avarıalyq-qutqarý jáne sý tasqynyna qarsy jumystarǵa barlyǵy 20 myńnan astam adam jáne 2 772 birlik tehnıka, 335 sý sorǵysh qural, 249 júzý quraly, sondaı-aq 7 áýe kemesi jumyldyryldy.
Atyraý oblysynda ushqyshsyz ushý apparattary arqyly Jaıyq ózenindegi sý deńgeıiniń monıtorıńi jalǵasýda. Jaǵalaýdy nyǵaıtý jumystary júrgizilýde.
Qoıylǵan mindetterdiń oryndalýyna baılanysty Qorǵanys mınıstrliginiń Almaty jáne Qaraǵandy oblysyndaǵy kúshteri men quraldarynyń bir bóligi buryn Batys Qazaqstan jáne Soltústik Qazaqstan oblystaryna jiberilgen bolatyn, endi turaqty ornalasý oryndaryna qaıtarylýda.