Aqtóbe oblysynda 2024 jylǵy sý tasqynynan qıraǵan Ýıl ózeni arqyly ótetin jańa kópir paıdalanýǵa berildi, dep habarlaıdy infohub.kz.
Oblys ákimdiginiń málimetinshe, Ýıl aýdanynda Ýıl aýylyna aparatyn tas joldaǵy kópirdi qaıta jańartý jumystary tolyq aıaqtaldy. Jańa kópirdiń saltanatty ashylýy 22 tamyzda ótti. Sharaǵa Aqtóbe oblysy ákiminiń orynbasary Asylbek Esenbaev, aýdan basshylyǵy, merdiger uıym ókilderi, aýdannyń qurmetti azamattary men aýyl turǵyndary qatysty.
«Biz Ýıldi oblys ortalyǵymen baılanystyratyn kópten kútken jańa kópirdi paıdalanýǵa berý aldynda turmyz. Nysannyń kúrdeliligi men mańyzdylyǵyn eskere otyryp, jobalaý kezeńinen búgingi kúnge deıin qurylys qatań tehnıkalyq baqylaýda boldy», — dedi Asylbek Esenbaev.
Óńir basshysynyń orynbasary kópir qurylysy eki kezeńde júrgizilgenin, onyń ishinde aýqymdy jáne uzaqqa sozylǵan jerasty jumystary oryndalǵanyn atap ótti. Onyń aıtýynsha, jańa kópir óńirdegi iri kópir qurylystarynyń birine aınaldy jáne jolaýshylar qozǵalysynyń qaýipsizdigin qamtamasyz etedi.
Ákimdikte 2024 jylǵy sý tasqyny kezinde Ýıl aýylyna aparatyn tas joldaǵy ózen arqyly ótetin kópir shaıylyp, qatty zaqymdanǵanyn atap ótti. Sol jyly qoldanystaǵy kópirdi bólshekteý jumystary júrgizildi. 2025 jyldyń qańtarynda jobalaý-smetalyq qujattama ázirlenip, saraptamanyń oń qorytyndysy alyndy. Nysannyń jalpy quny — 3,2 mlrd teńge. Qaıta jańartylǵan kópirdiń uzyndyǵy 280 metrdi quraıdy.
Eske salaıyq, 2025 jyldyń naýryzynda Ýıl aýylyna tek motorly qaıyqpen jetýge bolatyny, sebebi ýaqytsha ótkeldi sý shaıyp ketkeni habarlanǵan bolatyn. Keıin bılik turǵyndar úshin ýaqytsha kópirdi qaıta salatynyn málimdedi.