«Aktobe» fýtbol klýby Qazaqstan premer-lıgasynyń 19-týry aıasynda óz alańynda «Okjetpesti» jeńip, týrnır kestesinde úshinshi orynǵa kóterildi, dep habarlaıdy infohub.kz saıty.
Qazaqstan chempıonatynyń elıtalyq dıvızıony 19-týrynda úsh kezdesý ótip, barlyǵy birdeı 2:1 esebimen aıaqtaldy.
«Aktobe» maýsymdy sátsiz bastaǵanymen, bapker aýysqannan keıin (bolgarıalyq Nıkolaı Kostovtyń ornyna slovakıalyq Shtefan Tarkovıch keldi) bes dúrkin chempıon birtindep formasyn tapty. Birinshi aınalymnyń ashylýy bolǵan «Okjetpespen» kezdesý aldynda aqtóbelikter úshinshi oryndaǵy qarsylasynan nebári eki upaı keıin turǵan edi.
5-mınýtta-aq makedonıalyq Ianı Atanasov standarttyq jaǵdaıdan soń esep ashty. Taımnyń ortasynda úı ıeleriniń taǵy bir buryshtap soqqan doby Temirlan Erlanovtyń golyna ákeldi — 2:0. Birinshi taımnyń sońyna qaraı «Okjetpestiń» ózbek jartylaı qorǵaýshysy Shahboz Umarov aıyrmashylyqty qysqartty — 2:1. Ekinshi taımda gol bolmady.
Bul jeńis «Aktobege» kestede «Astana» men «Okjetpesti» basyp ozýǵa múmkindik berdi. Alaıda, elordalyq klýbtyń qory oıyny bar: erteń «Astana» «Altaıdy» qabyldaıdy.
Týrdyń qalǵan eki machy uqsas senarımen ótti: qonaqtar esep ashty, úı ıeleri esepti teńestirdi, sodan keıin sheshýshi gol jiberip aldy. Jezqazǵanda «Ulytaý» «Ertiske» (1:2) ese jiberse, Taldyqorǵanda «Jetisý» «Qyzyljardan» (1:2) utyldy. Jeńis goldaryn pavlodarlyqtar úshin ıvýarıalyq Jan-Moreno Poe, al petropavldyqtar úshin kamerýndyq Stefan Baoken soqty. Aıta keterligi, «Qyzyljar» Aleksandr Sokolenko alańnan shyǵarylǵan soń on adammen oınap, sheshýshi goldy engizdi.
Týrdyń ortalyq machy «Qaırat» — «Ordabasy» 26 shildede ótedi. Sol kúni «Tobyl» — «Atyraý», «Elimaı» — «Qaısar», «Astana» — «Altaı» jáne «Kaspı» — «Jeńis» oıyndary da oınalady.