Aqtóbe oblysyndaǵy iri órtti sóndirýge júzden astam adam, ushqyshsyz ushý apparaty jáne Starlink jabdyǵy jumyldyryldy, dep habarlaıdy infohub.kz saıty.
Keshe Qarǵaly aýdanynyń Ashshylysaı aýyldyq okrýginde qurǵaq shóp órtendi. Qatty jeldiń saldarynan jalyn tez tarap, shamamen 83 gektar aýmaqty shaldy.
TJM málimetinshe, órtti sóndirýge mınıstrliktiń kúshi men quraldary, «Aýyl qutqarýshylary» eriktileri, TJM 20982 áskerı bóliminiń áskerı qyzmetshileri, aýyldyq okrýg ákimdikteriniń ókilderi, erikti órt sóndirý quramalary jáne orman sharýashylyǵy qyzmetkerleri tartyldy. Barlyǵy shamamen 110 adam men 20-dan astam tehnıka jumys istedi.
Vedomstvonyń aıtýynsha, jaǵdaıdy baqylaý úshin ushqyshsyz ushý apparaty paıdalanyldy, al Starlink jabdyǵy jumysqa qatysýshylar arasynda jedel baılanysty qamtamasyz etti.
Órt tolyǵymen sóndirildi, zardap shekkender joq. TJM tabıǵı alqaptarda órt qaýipsizdigi erejelerin saqtaý qajettigin eske salady: órt qaýipti kezeńde ot jaǵýǵa jáne qurǵaq ósimdikterdiń tutanýyna ákelýi múmkin áreketterge tyıym salynady.