Aqtóbe oblysynyń turǵyny tanysymen birge toı-dýmannan keıin 1 mln teńgeden aıyryldy. Aqsha banktik qosymsha arqyly aýdarylǵan, dep habarlaıdy infohub.kz.
Aqtóbe oblysynda 41 jastaǵy er adam tanysynyń shotynan 1 mln teńgeni urlady degen kúdikke ilindi. Polısıanyń málimdeýinshe, ol birge otyrǵan toı ústinde basqa adamnyń smartfonyn paıdalanyp, aqshany óz shotyna aýdarǵan.
İshki ister mınıstrliginiń vedimistik saıtynda habarlanǵandaı, telefon ıesi basqa qonaqtarmen sóılesip otyrǵanda, kúdikti baıqatpaı telefondy alyp, bank qosymshasyn ashyp, aqshany óz shotyna aýdaryp jibergen.
Zardap shegýshi aqshanyń joǵalǵanyn birneshe kún ótken soń, bank operasıalarynyń tarıhyn tekserip kórgende ǵana bilgen. Sodan keıin ol polısıaǵa aryzdanǵan.
Kúdiktini kóp uzamaı anyqtap, polısıa bólimine jetkizdi.
Polısıanyń habarlaýynsha, jaýap alý kezinde ol kinásin moıyndap, urlanǵan aqshany jeke qajettilikterine jumsap úlgergenin aıtqan.
Urlyq faktisi boıynsha sotqa deıingi tergeý bastaldy.
Polısıa tanystar arasynda da telefondy qaraýsyz qaldyrýǵa jáne bógde adamdarǵa berýge bolmaıtynyn eskertti.
«Qazirgi zamanǵy smartfon — bul tek baılanys quraly ǵana emes, sonymen qatar sizdiń bank shottaryńyzǵa kirý múmkindigi. Birneshe sekýndtyq nemquraılylyq óte qymbatqa túsýi múmkin, al bireýdiń aqshasyn ıemdenýge degen ynta paıda emes, qylmystyq jaýapkershilikke ákep soqtyrady», — dep atap ótti vedomstvoda.