Aqtóbede aýdany 7,4 myń sharshy metrden asatyn temirjol vokzalynyń rekonstrýksıasy aıaqtaldy, dep habarlaıdy infohub.kz.
«Qazaqstan temir joly» kompanıasynyń málimetinshe, jańartý temirjol vokzaldaryn jańǵyrtý baǵdarlamasy aıasynda júrgizildi. Jertóle jáne tehnıkalyq qabattary bar alty qabatty ǵımaratta jańa shatyr, qasbet jáne ınjenerlik jeliler ornatylyp, ishki bólmeler jóndeldi. Qasbet fıbrosementti plıtalarmen qaptaldy.
Ǵımaratta lıftiler men eskalatorlar ornatylyp, jańa jıhaz ben jabdyqtar satyp alyndy. Rekonstrýksıada qazaqstandyq óndiris materıaldary qoldanyldy. Sonymen qatar, irgeles aýmaq abattandyrylyp, múmkindigi shekteýli jolaýshylarǵa jaǵdaı jasaldy.
Aqtóbe temirjol vokzaly 1976 jyly salynǵan. Qazir onyń táýliktik jolaýshylar aǵyny 4,7 myń adamnan asady.
Stansıa arqyly Aqtóbeni Astana, Almaty, Oral, Mańǵystaý, Beıneý, Taraz, Shý, Shymkent, Túrkistan, Qyzylorda, Kókshetaý, Qostanaı, Býrabaı kýrorty jáne Atyraýmen baılanystyratyn 34 jolaýshylar poıyzy ótedi.
Sondaı-aq vokzal arqyly Aqtóbeni Reseı, Ózbekstan, Tájikstan jáne Qyrǵyzstan qalalarymen baılanystyratyn halyqaralyq baǵyttar da ótedi.
QTJ-da rekonstrýksıa jolaýshylarǵa qyzmet kórsetý sapasyn arttyrýǵa, qolaıly ári qaýipsiz jaǵdaı jasaýǵa, sondaı-aq temirjol ınfraqurylymy nysanynyń syrtqy kelbetin jańartýǵa baǵyttalǵanyn atap ótti.
Buǵan deıin 2026 jyly Qazaqstanda Táýelsizdik jyldaryndaǵy eń iri temirjol vokzaldaryn jańǵyrtý baǵdarlamasy júzege asyrylatyny, ol búkil el boıynsha 124 nysandy qamtıtyny habarlanǵan bolatyn. Sonymen qatar, QTJ temirjol jelisin keńeıtip, lokomotıvter men jolaýshylar vagondaryn jańartýda: jyl basynan beri park 144 lokomotıvke tolyqty, al on jyl ishinde 1 082 birlik satyp alý josparlanýda.