Aqtóbede týrısik kompanıanyń ondaǵan klıenti joldama aqysyn tólegennen keıin demalysqa usha almaǵanyn málimdedi. Zardap shekkenderdiń aıtýynsha, kompanıa baılanysqa shyǵýdy toqtatqan, al jalpy shyǵyn kólemi 219 mln teńgege jetýi múmkin, dep habarlaıdy infohub.kz saıty.
Zardap shekkenderdiń biri Dınara Qatan chekter men ózge de rastaıtyn qujattardy jınaǵanyn aıtty. «Jalpy shyǵyn kólemi – 219 mıllıon. Bizde tizim, chekter – bári bar. Barlyǵy aryz jazdy. Bizdiń talabymyz – bári zańdy bolýy jáne aqshamyzdy qaıtarýy», – dedi ol.
Taǵy bir klıent Asylbek Dúısenbekov 5-13 tamyz aralyǵynda Antalıaǵa otbasylyq týr satyp alǵanyn habarlady. Ushý Almatydan júzege asýy kerek edi. «Biz otbasymyzben Almatyǵa keldik, bıletterdi jiberemiz dep ýáde berdi. Biraq ushýdan bir kún buryn týrymyzdyń kúshi joıylǵanyn habarlady. Men kompanıaǵa shamamen 2 mln teńge tóledim», – dedi ol.
Klıentterdiń sózinshe, olar Túrkıa, Mysyr jáne Grýzıada demalysty josparlaǵan. Keıbireýleri buǵan deıin osy kompanıanyń qyzmetin paıdalanyp, shetelge sátti saparlaǵan, sondyqtan tanystarynyń usynysymen taǵy da osy kompanıaǵa júgingen.
Týrıserdiń bir bóligi joldamalardy bólip tóleý arqyly rásimdep, qazir sapar ótpegenine qaramastan qaryzdy tóleýdi jalǵastyrýda. Sonymen qatar, kópshiligi halyqaralyq reıster josparlanǵan Almatyǵa deıingi jol aqysyn óz betinshe tólegen.
Zardap shekkender aldymen kompanıa qyzmetkerleri kezdesýlerdi keıinge shegerip, sapar máselesin sheshemiz dep ýáde bergenin, alaıda keıin qońyraýlar men habarlamalarǵa jaýap berýdi toqtatqanyn aıtady.
Polısıaǵa alǵashqy aryz 6 tamyzda túsken. Qazirgi ýaqytta resmı túrde 17 adam ótinish bildirgen.
Aqtóbe oblysy polısıa departamentinde alaıaqtyq baby boıynsha sotqa deıingi tergeý júrgizilip jatqanyn habarlady. «Sondaı-aq, tulǵasy anyqtalǵan kúdiktiniń ornalasqan jerin anyqtaý boıynsha jedel-izdestirý is-sharalary júrgizilýde», – dedi Aqtóbe oblysy PD baspasóz qyzmetiniń jetekshisi Erbolat Sarqulov.
Týrısik kompanıa ıesiniń ornalasqan jerin qazir quqyq qorǵaý organdary anyqtap jatyr.