Aqtóbe oblysynyń Jabasaq aýylynda úsh jyl buryn jóndelgen aýyl klýby jarylyp ketti. Endi jergilikti turǵyndar búdjet qarajaty qaıda jumsalǵanyn anyqtaýdy talap etip otyr, dep habarlaıdy infohub.kz saıty.
KTK telearnasynyń dereginshe, kitaphana men balalar úıirmeleri jumys isteıtin ǵımaratta oqýshylar da shuǵyldanady. Aýyl turǵyndary qabyrǵalardyń jarylǵanyn, esikterdiń durys jabylmaıtynyn, al tóbeniń keıbir bólikteri kez kelgen sátte qulap ketýi múmkin dep qaýiptenetinin aıtyp shaǵymdanyp otyr.
Ǵımaratty kúrdeli jóndeýge 62 mıllıonnan astam teńge jumsalǵan. Endi Jabasaq turǵyndary aqsha qaıda ketti jáne merdiger jumysty qanshalyqty sapaly oryndady degen suraqqa jaýap izdep otyr. Halyq jaǵdaıdy anyqtap, kinálilerdi jaýapqa tartýdy talap etýde.
Alaıda sheneýnikter kepildik merzimi burynnan ótip ketkenin, endi ózderi qaıta jóndeýge daıyndalyp jatqanyn málimdedi.
«Jabasaq aýyldyq klýbyn apatty dep sanaýǵa negiz joq. Qazirgi tańda aýyldyq klýb qalypty rejımde jumys istep tur. Aǵymdaǵy jóndeý júrgizý josparlanýda», — deıdi Áıteke bı aýdany mádenıet úıiniń dırektory Azamat Sátbekov.