Aqtóbe oblysynyń ákimdigi jol jóndeýge ınovasıalyq tásildi engizetinin málimdedi: Aqtóbede «qalqymaly» dep atalatyn lúkter ornatyla bastaıdy, dep habarlaıdy infohub.kz saıty.
Oblystyq ákimdikte túsindirgendeı, qala úshin jańa tehnologıa jol tóseminiń beriktigin arttyryp, júrgizýshilerge yńǵaıly júrýge múmkindik beredi.
Dástúrli ádiste lúk asfált tóselgenge deıin temirbeton plıtaǵa ornatylsa, jańa tehnologıa asfált tóselgennen keıin arnaıy retteletin tirekti ornatýdy kózdeıdi. Osynyń arqasynda lúk jol deńgeıimen dál bekitilip, tósemniń ajyramas bóligine aınalady.
Mamandardyń aıtýynsha, mundaı júıe áldeqaıda úlken kólik júktemesine tótep bere alady. Bul lúkterdiń aınalasyndaǵy asfálttyń shógýine jol bermeıdi, al bul kóbinese tegissizdikterdiń paıda bolýyna jáne avtomobılderdiń aspasynyń zaqymdalýyna ákeledi.
Qajet bolǵan jaǵdaıda lúktiń bıiktigin aýqymdy jol jumystaryn júrgizbeı-aq retteýge bolatyny atap ótildi. Jańa qurylymnyń qyzmet etý merzimi 10-15 jyldy quraıdy. Bul tehnologıa Reseıde jáne basqa da birqatar elderde keńinen qoldanylady.
Aqtóbede ony alǵash ret qaladaǵy eń kóp júktelgen kóshelerdiń birinde synaqtan ótkizý josparlanýda. Eger jańa júıe qarqyndy qozǵalys jaǵdaıynda óz tıimdiligin kórsetse, ol qalanyń basqa da joldaryn jóndeýde qoldanylatyn bolady, dep qosty ákimdikte.