Profesor Káken Qamzın alaıaqtar jymqyrǵan 32 mıllıon teńgeniń tolyq jınalǵanyn habarlady. Bul týraly ol Facebook paraqshasynda jazdy.
Onyń aıtýynsha, bir jarym aı buryn alaıaqtarǵa aldanyp, úıinen aıyrylyp qala jazdaǵan. 5 shildeden bastap el ishinde «jylý» jınaý bastalyp, osy ýaqytqa deıin kópshiliktiń qoldaýymen 9,5 mıllıon teńge túsken.
Búgin, Qamzınniń sózine qaraǵanda, aty-jónin ataýdy qalamaǵan bir azamat jetispeı turǵan 23 mıllıon teńgeni qolma-qol ákelip bergen. «Bul tek qarjylaı kómek emes, senimniń, birliktiń, meıirimniń shynaıy kórinisi. Ol azamatqa Alla razy bolsyn!» – dep jazdy profesor.
Jınalǵan qarajat satyp alýshy otbasyǵa berilip, úıdi óz atyna qaıta rásimdeý jumystary bastalmaq.