Kók maısa betegeli jeriń qaıda?
Kúmisteı tolqyndaǵan kóliń qaıda?
Yń-jyń bop jer qaıysqan tórt túlikpeı,
Jóńkilip, kóship qonǵan eliń qaıda?
Kótergen aq kıizge hanyń qaıda?
Qıǵash qas, bıdaı óńdi hanym qaıda?
Túnergen syrtqa aıbyndy irgeń bútin,
Bir kezde basqa qonǵan baǵyń qaıda?
Qaq jarǵan qara qyldy bıiń qaıda?
Aq orda bı túsetin ýıiń qaıda?
Saltanat Saryarqada qurǵan qazaq,
Tolyqsyp júrgen keshe kúniń qaıda?
Shań jutqan tekejáýmit atyń qaıda?
Qaldyrmas jaýǵa tastap jaqyn qaıda?
Ushqyr at, túzý myltyq, bolat naıza,
Kıingen kók dýlyǵa batyr qaıda?
Qamyǵyp kanǵa tolǵan júrek qaıda?
Burq etken bir aýyzdan tilek qaıda?
Jaıaýǵa at, jalańashqa kıim bolyp,
Qarasqan nasharyńa kómek qaıda?
Bermeıtin el namysyn eriń qaıda?
Súıener qysylǵanda beliń qaıda?
Óıtkeni aıtqany eki bolmaıtuǵyn,
Asyl zat artyq týǵan begiń qaıda?
Shaldyrmas toptan týra sheshen qaıda?
Ulyqpen el bastaǵan kósem qaıda?
Qazaǵym, qazakshylyq qalpyń menen
Dańǵyl jol saırap jatqan kósheń qaıda?
Kemeńger duǵaly aýyz kári qaıda?
Dertińe shıpa bolar dári qaıda?
Masaırap kimge senip qarysasyń,
Jaýap ber, osylardyń bári qaıda?
Jaýap sol: etken dáýren qaıta kelmes,
Qanshama óksigenmen taǵdyr kónbes.
Bul kúngi qarashyl qart, parashyl bı
Ótkender kelgenmen de oryn bermes.
Sóıtkenmen, qazaq kóshin ońǵa bastap,
Júrýdi ózdiginen taǵy bilmes.
Meıliń kón, meıliń, jyla sońǵylarǵa,
Qaıtsyn-aı, qamyqty-aý dep, kózine ilmes.
«İshken mas, jegen toqtyń» zamany bul:
Ashyqqan, ashynǵanyń túkke júrmes.
«Mal qumar, maldyń qoly» degen aqyn,
Kim qaqsa «jemtiginen» soǵan kúndes.
Alashym, aıtqandy alsań, bez bulardan:
Esh nárse táýip bermes, bilgenge ermes.
Qoı baǵyp qasqyr qashan opa qylǵan,
Kóre ber óz betińmen kúnińdi ólmes.
Qaıraǵan qoldan kelmes iske áýre bop,
Qorlyqqa, tilimdi alsań, bolma kezdes!

---