Qazaqstandyqtar «Orda aımaq» jáne «Orda aımaq plús» jeńildikti ıpotekalyq baǵdarlamalary boıynsha keńes alyp, qujattardy Alatau City Bank bólimshelerinde tapsyra alady. Tıisti yntymaqtastyq kelisimin «Qazaqstandyq Turǵyn úı kompanıasy» («Báıterek» holdıńiniń enshiles qurylymy) jáne bank jasasty, dep habarlaıdy infohub.kz saıty.
Kelisim aıasynda Alatau City Bank áleýetti qaryz alýshylarǵa baǵdarlamalardyń sharttary boıynsha keńes berip, qajetti qujattardy qabyldap, tekseredi, nesıe ótinimderin rásimdep, odan ári qaraý úshin QTK-ǵa jiberedi. Bul azamattarǵa turǵyn úı nesıesin alý prosesin yńǵaıly ári qoljetimdi etedi.
«Bank-seriktestermen yntymaqtastyq azamattarǵa turǵyn úı nesıesin alý prosesin yńǵaıly ári túsinikti etýge múmkindik beredi. Kelisim aıasynda Alatau City Bank-tiń óńirlik keńseleri áleýetti qaryz alýshylarmen ózara is-qımyldyń qosymsha núktesine aınalady – keńes berýden bastap qujat qabyldaýǵa deıin, qajetti sharttardy rásimdeýge deıin», – dep atap ótti QTK basshysy Altaı Quzdibaev.
«Orda aımaq» jáne «Orda aımaq plús» baǵdarlamalary Astana, Almaty jáne Shymkentten basqa Qazaqstannyń barlyq óńirlerinde QTK kepildigi bar úlestik qatysýmen salynyp jatqan barlyq nysandarǵa qoldanylady. «Orda aımaq» baǵdarlamasy boıynsha mólsherleme jyldyq 15,9% quraıdy (NAS 16,97%-dan 18,32%-ǵa deıin). «Orda aımaq plús» úshin NAS bastapqy jarnaǵa baılanysty 11,70%-dan 16,20%-ǵa deıin ózgeredi. Eki baǵdarlama boıynsha da bastapqy jarna keminde 20% bolýy kerek, nesıe somasy – 2-den 75 mıllıon teńgege deıin, merzimi – 24-ten 240 aıǵa deıin (20 jylǵa deıin).
Eske salaıyq, mamyr aıynda «Qazaqstandyq turǵyn úı kompanıasy» qurylys salýshylarǵa úleskerlerdiń qarajatyn menshikti kepildikpen jáne jańa «Orda Aımaq» ıpotekasymen tartýdy usynatyny belgili boldy. Sonymen qatar, 1 qyrkúıekten bastap «Orda aımaq» ıpotekasynyń sharttary ózgeredi: ony qosymsha múlik usynbaı-aq, salynyp jatqan páterdiń ózin kepilge qoıý arqyly alýǵa bolady. Maýsym aıynan bastap elimizde salynyp jatqan turǵyn úı keshenderindegi páterlerdi satyp alýǵa baǵyttalǵan «Orda Aımaq Plús» óńirlik baǵdarlamasy da jumys isteıdi.