Aldar kóse baıdyń qoıyn jaıypty. Jaıyp júrip, bir kúni shyqpaq bolypty. Baıdyń balasy joq eken. Qoınyna ystyq nandy tyǵyp, qoıyna ketip bara jatsa, Aldar kóse kelip:
— Baı, senimen qushaqtasyp keteıin, — dep, baıǵa kelipti. Baıǵa «qosh» dep, qushaqtasyp kórisipti. Qoınyndaǵy ystyq nan qoınyn kúıgizse, baı nandy:
— It jegir-aı, — dep, laqtyryp jiberse, Aldar kóse:
— It jegenshe, men jeıin, — dep, sol arada nandy jep alypty.
Baıdyń úsh qyzy bar eken. Úlkeniniń aty — Jýanbiz, ortanshysynyń aty — Ortanshybiz, kishisiniń aty — Jińishkebiz eken. Ásirese, kishi qyzy sulý eken. Aldar kóse baıǵa aıtypty.
— Baıeke, baıeke, jińishke bizińizdi bere tursańyz. Etigimdi tigip alaıyn, — deıdi.
Baı:
— Úıge barsań, qatyn beredi, — deıdi. Aldar kóse úıine kelip:
— Baı Jińishkebizdi maǵan al dedi, — dep, qatynyna aıtypty. Qatyny «bermeımin» dese, Aldar kóse baıǵa aıqaı salypty. Sóıtse, baı ashýlanyp, qatynyna:
— Ber, — depti. Qatyny Jińishkebizdi Aldar kósege berip jiberipti. Aldar kóse Jińishkebizdi alyp kele jatsa, bir taz qoı baǵyp júr eken. Aldar kóse tazǵa aıtypty.
— Tazym, tazym, basyńdy jazyp bereıin be? — depti. Taz:
— Maqul, — depti.
— Kók serkeńdi ákel, — dep, serkeni soıyp, qarnyn-jynyn tazdyń basyna qaptap:
— Sen endi osy qudyqqa túsip, jylyn. Qasyńa bir eshki baılap qoıasyń. Sol eshki mańyraǵanda, tazyń ketedi, — dep, eshkini baılap ketipti. Sóıtse, qoı ketip qalypty. Aldar kóse Jińishkebizben kele jatsa, bir qart qos aıdap júrse, sartqa kelip, Aldar kóse qartqa aıtypty.
— Sart, men seniń úıińnen tamaq iship shyqtym. Qatynyń tamaǵyńdy daıarlap tur, maǵan «sen aıdaı tur» dedi, — depti. Sart senip, úıine ketip qalsa, ógiziniń quıryǵyn kesip, jerge qadap, eki ógizdi Jińishkebizben bir beldiń astyna aparyp qoıyp, sartqa aıqaılapty.
— Sartaq sart, ógiziń jerge kirip ketti, — dep aıqaılaıdy. Sart kelip, quıryqty tartsa, Aldar kóse «julynady, tartpa» dese, sart bolmaı, julyp alypty.
— Áne, julma desem de juldy.
Sart jerdi qazyp-qazyp, taba almaı, sart úıine ketipti.
Aldar kóse Jińishkebizdi, eki ógizdi alyp, jolyna túsipti.