Bıylǵy jyldyń basynan beri Áleýmettik medısınalyq saqtandyrý qory medısınalyq qyzmet kórsetýshilerge tegin medısınalyq kómektiń kepildik kólemi jáne mindetti áleýmettik medısınalyq saqtandyrý aıasynda 1,6 trıllıon teńge baǵyttady. Bul rette qarajattyń jartysyna jýyǵy klınıkalardy avanstaýǵa jumsaldy, dep habarlaıdy infohub.kz.
Qordyń resmı saıtynda jarıalanǵan málimetke sáıkes, jalpy somanyń 864,4 mıllıard teńgesi kórsetilgen kómekke aqy tóleýge, al 731,8 mıllıard teńgesi medısınalyq uıymdardy avanstaýǵa jumsaldy.
Qorda atap ótkendeı, tólemge 1,186 trıllıon teńge somasyndaǵy aktiler qabyldanǵan, bul qarjylandyrýdyń jyldyq josparynyń 53 paıyzǵa oryndalýyn qamtamasyz etti.
Aktilerdiń keshigýi máselesin sheshý úshin vedomstvo tólemderdi jańa sıfrlyq Qalqan platformasyna aýystyra bastady. Bólshektep aktileýdiń arqasynda rastalǵan kólemderdi aıdyń jalpy aktisi jabylǵansha kútpeı-aq, medısınalyq kómektiń jekelegen túrleri boıynsha tóleýge bolady, dep túsindirdi Qorda.
27 tamyzdaǵy jaǵdaı boıynsha Qalqan arqyly 4 mıllıard teńge somasyndaǵy alǵashqy tólemder júrgizildi.
Aldyńǵy kúni Qalqan sıfrlyq platformasynyń pılottyq jobasy 16 medısınalyq uıymǵa deıin keńeıtilgeni belgili boldy. Júıe medısınalyq kómekti josparlaýdy, satyp alýdy, monıtorıńti jáne tólemdi biriktirýi tıis. Barlyq prosesterdi tolyq sıfrlandyrýdy aǵymdaǵy jyldyń sońyna deıin aıaqtaý josparlanýda.
Buǵan deıin Qazaqstanda MÁMS júıesinde qarjylyq baqylaý tásili ózgerip jatqany habarlanǵan bolatyn. MÁMS reformasy bıylǵy jyldyń aqpan aıynda Áleýmettik medısınalyq saqtandyrý qory Qarjy mınıstrliginiń qaramaǵyna berilgennen keıin bastaldy. Ózgeristerdiń basty qaǵıdattarynyń biri — tólemderden keıingi tekserýlerden buryn buzýshylyqtardyń aldyn alýǵa kóshý.