Ózbekstandyq Alif Moliya fınteh-kompanıasy Qazaqstanda sýkýk ıslam oblıgasıalaryn shyǵarýǵa daıyndalyp jatyr. Buǵan ekonomıs Arman Bataev nazar aýdardy. Jospardy júzege asyrý úshin «Astana» halyqaralyq qarjy ortalyǵynda (AHQO) Alif Moliya Sukuk SPC Ltd. arnaıy qurylymy tirkeldi. Ol baǵaly qaǵazdardy ornalastyratyn emıtent kompanıa retinde áreket etedi, dep habarlaıdy infohub.kz saıty.
Tashkenttik Alif Moliya Ózbekstan naryǵynda 2019 jyldan beri jumys isteıdi jáne halyqaralyq Alif Capital Group (Ulybrıtanıa) tobyna kiredi. Kompanıa aımaqta elektrondyq komersıa men BNPL («qazir satyp al, keıin tóle») modeli boıynsha tutynýshylyq qarjylandyrý salasynda kósh bastap tur.
Fırma barlyq qarjylyq qyzmetin ıslam qarjylandyrý qaǵıdattaryna qatań sáıkes usynady — atap aıtqanda, Alif Nasiya bólip tóleý servısi arqyly.
KPMG zertteýiniń dereginshe, Alif Nasiya men Uzum Nasiya servısteri Ózbekstandaǵy bólip tóleý naryǵynyń úshten ekisin alyp otyr. Al Alif Moliya-nyń óz esebi boıynsha, onyń Alif Nasiya platformasy jergilikti BNPL-satyp alý naryǵynyń 35%-dan astamyn qamtıdy.
Fınteh-kompanıa halyqaralyq kapıtal naryǵynda tájirıbesi bar: 2025 jyldyń sáýirinde Alif Moliya sýkýk shyǵarǵan tuńǵysh ózbekstandyq uıym atandy. Sol kezde kásiporyn 50 mln dollarlyq jalpy baǵdarlama aıasynda Lúksembýrg qor bırjasynda 5 mln dollarlyq oblıgasıa ornalastyrdy. Endi kompanıa qaryz alý geografıasyn keńeıtip, AHQO alańdaryn paıdalanýdy josparlap otyr.
Buǵan deıin «Kýrsıv» Alif Pákistanda banktik emes kredıttik uıym lısenzıasyn alyp, elde bıznesti belsendi damytýǵa kiriskenin jazǵan bolatyn.