Ulytaý oblysynda alıment tólemegen 22 boryshker anyqtaldy. Olar óz balalaryna qarajat bólýdiń ornyna býkmekerlik platformalarda stavka jasaǵan, dep habarlaıdy infohub.kz saıty.
Bas prokýratýranyń resmı Telegram-arnasynyń málimetinshe, ata-analyq mindetterin oryndamaı, alıment boıynsha qaryzy bar turǵyndar oıyn shottaryn tolyqtyryp, stavka jasap, utys alyp otyrǵan.
Máselen, bir boryshkerdiń alıment boıynsha bereshegi 3,9 mln teńge bolǵan. Ol 2020 jyldan beri býkmekerlik keńsede tirkelip, jeke shotyna 4,6 mln teńge aýdaryp, 3,1 mln teńge utys alǵan. Al balalaryn asyraýǵa qarajat bólmegen.
Anyqtalǵan derekter boıynsha Qylmystyq kodekstiń 139-baby (Balalardy asyraýǵa arnalǵan qarajatty tóleýden jaltarý) boıynsha sotqa deıingi tergeý bastaldy.