Jambyl oblysynda sot toǵyz kámeletke tolmaǵan balanyń ákesin resmı nekede tursa da alıment tóleýge mindettedi. Bul sheshim er adamnyń otbasymen turmaıtyny jáne balalardy asyraýǵa qatyspaıtyny anyqtalǵannan keıin qabyldandy, dep habarlaıdy infohub.kz.
Jambyl oblysy sottarynyń resmı Telegram-arnasynda habarlanǵandaı, Turar Rysqulov aýdandyq soty toǵyz kámeletke tolmaǵan balany asyraýǵa alıment óndirý týraly talap aryz boıynsha azamattyq isti qarady. Talap aryzǵa sáıkes, jaýapker balalardyń zańdy ákesi, alaıda birneshe aı boıy otbasymen birge turmaıdy jáne materıaldyq kómek kórsetpeıdi. Jubaılar arasyndaǵy neke resmı túrde buzylmaǵanyna qaramastan, birge turý toqtatylǵan.
Talapker sottan jaýapkerden balalar kámeletke tolǵanǵa deıin onyń jalaqysynyń jáne ózge de tabystarynyń 50 paıyzy mólsherinde alıment óndirýdi surady. İs materıaldary men usynylǵan dáleldemelerdi zerdeleı kele, sot talaptyń negizdiligi týraly qorytyndyǵa keldi. Sheshim shyǵarý kezinde sot taraptardyń otbasylyq jáne materıaldyq jaǵdaıyn, sondaı-aq ata-analardyń kámeletke tolmaǵan balalaryn asyraý mindetin eskerdi.
Nátıjesinde sot buıryǵymen talap qanaǵattandyryldy. Jaýapkerden toǵyz balany kámeletke tolǵanǵa deıin asyraý úshin 2026 jylǵy tamyzdan bastap aı saıyn jalaqysy men ózge de tabystarynyń 1/2 bóligi óndiriledi. Sonymen qatar, jaýapkerden memleket paıdasyna memlekettik baj óndirildi. Sot aktisi zańdy kúshine endi.